Melkorka Ólafsdóttir / Mynd: Saga Sig
Eftir Melkorku Ólafsdóttur
Úr ljóðabókinni Hérna eru fjöllin blá sem er væntanleg 21. nóvember. Svikaskáld gefa út.
Sendingar
Vinkonu minni finnst
að fjöllin
fjöllin og hann
muni éta hana kæfa hana
kæfa hana fyrst éta hana svo
svo hún breytir þeim í pappír
brýtur þau rólega í tvennt og svo fernt
ég hlakka alltaf til sendinganna
opna bréfin varlega
anda að mér uppþornuðum vonum
halla mér aftur í sunnudagsstól
fjarlægðin
og marið er ekki lengur blátt
fjöllin eru blá
hérna eru fjöllin blá
Blæðingar
Við höfum vaðið stórfljótið í nára
sleppt birkistöfunum í strauminn
ég strýk sólina á vanga þínum
ertu að telja hárin
spyrð þú
telja gráu hárin
og það rennur rautt
úr eyranu á mér
en ég skil:
sorgin hefur flætt gegnum jökulvatnið
hingað komin löngu á undan okkur
nálarnar þiðna í æðum okkar
framundan sólarglætur
og eldgömul jörð
