Eftir Hrafnhildi Hagalín Guðmundsdóttur

Úr Tímariti Máls og menningar, 1. hefti 2022

Ducoados negro, hvítur draugur líður
upp í rjáfur á markaðnum, þrír, fjórir
karlar, þegja við barinn, reykja,
reykja, einmanalegt skóhljóð
milli yfirbreiddra bása

á lítið skylt við skellina áður, hlátrasköllin, hávaðann,
dynkina sem hljómuðu og bárust
milli veggja og upp í loft, hátt, hátt upp í loft
og niður aftur, margfaldaðir, margraddaðir,
blandaðir hrópum og köllum og nöfnum á ávöxtum
og grænmeti og hversu mörg kíló og hversu mörg grömm
og hvaða part af svíninu, lambinu, túnfiskinum, þorskinum
ferskjur, tómatar, kirsiber, sítrónur, möndlur, avokadó
og heill her af kjöti og kröbbum og kræklingum
litlum fiskum og stórum og óleyfilegum sílum
í allavega litum, allt undirleikur við dæmisögu
sem sögð er

af manni
á markaðsbarnum

skálar í rauðvíni,
umkringdur lærlingum

eins og helgur maður hafi stungið sér niður
í tíma og rúmi

flæða út úr munni hans orð
innbyrt, melt á japönsku
íslensku, spænsku, frönsku, ensku

orð
yfir gjá

 

 

Hrafnhildur Hagalín Guðmundsdóttir

Hrafnhildur Hagalín Guðmundsdóttir / Mynd: Saga Sig