Eftir Kari Ósk Grétudóttur
Úr Tímariti Máls og menningar, 2. hefti 2021
Endurskin
þið báðuð okkur vinsamlegast að vera ekki lengur á meðal ykkar
svoleiðis að við hættum að vera meðal ykkar
létum okkur hverfa
urðum undirgefnar afturgöngur friðsælla grafa
þegar við urðum ónæm fyrir leysiefnunum
stóðum við upp
kveiktum eld
ristum mynd á hellisvegg
bundum skynjun við orð
uppvakningarnir sneru aftur
með flugrútu
í erindagjörðum
í frí
þið vissuð ekki hve stutt er á milli heima
þið vissuð ekki að á milli heima er aðeins örþunn himna
þið vissuð ekki að við erum mætt á BSÍ íklædd endurskini
Sara
þú leyfir mér að sjá gegnum vatnsbláa himnu
þar sem veröld er mild
að sorgin sem ég batt undir skó
er efni í leik
þú mýkir í mjólk
höndina þína roðarauða
þú kennir deigi að hefast
og eldi að nærast
margstrend er sýn þín
þú eilífðarvél
