Anton Helgi Jónsson / Mynd: Jóhann Páll Valdimarsson
eftir Anton Helga Jónsson
Úr Tímariti Máls og menningar 1. hefti 2014
Horfurnar um miðja vikuna
Það er bara miðvikudagur
enn getur allt gerst
enn er von
enn má finna rétta taktinn
finna sinn hljóm
jafnvel finna sig í góðu lagi
allt getur gerst
meðan enn leynist bílskúr
baka til í hausnum á mér
og band
sem djöflast frameftir.
Föstudagur á Miklubrautinni
Hvalur blés framundan
þar sem ég ók austur Miklubraut
eftir vinnu á föstudegi.
Hann maraði í yfirborði götunnar
en bílarnir tóku fram úr
án mikilla vandræða.
Á móts við innstu húsin
stakk hann sér loks í djúpið
og sporðurinn reis yfir malbikið.
