Eftir Valgerði Kristínu Brynjólfsdóttur
Úr Tímariti Máls og menningar 3. hefti 2019
Úr böndum
stálgrár himinn hleypir brúnum
niður í miðjar hlíðar
lausbeislaður
hvæsandi heybaggi
lemur frá sér með bægslagangi
á hrímfölu túni
hvítur plastfugl
á girðingu
ber vængjum í staur
og strekkist við að losna
af gaddavírsstreng
mórauður poki slær taktinn
með víðihríslu
á frostbólgnum lækjarbakka
skýjaslæður leggjast með lindum
á leið til hafs
ætla að finna það í fjöru
Martröð
við vöknum
vakin af óværum
blundi
himinninn grætur
kafnandi jörð
sökkvandi land
mara við stjórn
mara
troðum systkin
troðum
plastið marar
himinn og jörð eru í stríði
ísköldu stríði
í bráðnandi ís
köldu stríði
troðum systkin
troðum
plastið marar
troðum
