Eftir Fríðu Ísberg
Úr ljóðabókinni Leðurjakkaveður sem er væntanleg 10. október. Mál og menning gefur út.
Fríða Ísberg / Mynd: Saga Sig
Viðkvæmni
þegar ég var sex ára
gaf pabbi minn mér
leðurjakka
minn fyrsta leðurjakka
hann hefur þekkt á eigin skinni
að þau viðkvæmu
þurfa vörn
hann sagði: ef þau stríða þér
hlæðu að þeim
skilningur kemur í lögum
ekki eins og húð
heldur setberg
kemur
eins og rykský
á eftir jeppanum hans pabba míns
með hlátri sem höktir í takt við vélina
hlátrinum sem heyrist bara
þegar honum sárnar
Leðurjakkaveður
föstudagskvöld
það hringlar í stígvélasylgjunni
þegar þú gengur eins og Clint Eastwood
upp Tjarnargötuna á leiðinni í partí
„i have a very strict gun control policy:
if there’s a gun around, i want to be in control of it“
það rúmast ýmislegt
í hreyfingunni milli valds og valdaleysis
hávær hlátur
hársveifla
júníbirtan er plássfrekt barn
sem tekur allt rúmið
þú minnir þig á
að vera ekki eins og hún
í jakkavösunum
býrðu samt til byssur úr höndunum
