Nýtt tmm – 3. hefti ársins

16. október 2014 · Fært í Fréttir ·  

TMM_3_2014_front_150dpi

Nýlega kom nýtt hefti TMM, þriðja hefti ársins. Að þessu sinni er það helgað fólki sem er að hasla sér völl á íslenskum bókmenntavettvangi, og hefur ýmist aðeins gefið út eina bók eða enn ekki birt neitt eftir sig opinberlega. Auk þess er í heftinu ljóð eftir Vilborgu Dagbjartsdóttur, ádrepa eftir Pétur Knútsson og ritdómar.

Nýtt tmm

11. júní 2013 · Fært í Fréttir ·  

 

Komið er út nýtt hefti af Tímariti Máls og menningar þar sem kennir margra grasa að vanda. Árni Snævarr gerir upp dvöl sína á Stöð tvö í grein sem vekur áleitnar spurningar um eðli fjölmiðla og ábyrgð þeirra sem þá eiga og reka. Kristrún Heimisdóttir tekur viðtal við Jóhann Pál Árnason heimspeking sem ekki hefur tekið þátt í íslenskri stjórnmálaumræðu áratugum saman enda verið búsettur erlendis. Lesa meira

Nýtt TMM

2. október 2012 · Fært í Fréttir ·  

kápufronturtmm.3.12

Tímarit Máls og menningar, þriðja hefti ársins, er komið út.

Meðal efnis er kafli úr væntanlegri bók eftir Guðmund Pál Ólafsson um Vatnið í náttúru Íslands og minningarorð sem Halldór Guðmundsson flutti um Guðmund Pál í dómkirkjunni, 6. september síðastliðinn.

Birt er ljóð Péturs Gunnarssonar, 17. júní 2012, sem flutt var í sumar sem Ávarp Fjallkonunnar á Austurvelli og vakti mikla athygli en meðal annarra ljóðskálda má nefna Stefán Snævarr og Kristján Þórð Hrafnsson.

Ármann Jakobsson skrifar um hið yfirnáttúrulega, tröllskap og Snorra Goða en Einar Kárason skrifar um Egils sögu. Nær okkur í tíma eru greinar Brynju Þorgeirsdóttur um Sjón og verðlaunabók hans Skugga-Baldur og Soffíu Bjarnadóttur um bækur Lindu Vilhjálmsdóttur og Sigurbjargar Þrastardóttur; Ástráður Eysteinsson minnist skáldsins Jónasar Þorbjarnarsonar sem lést í sumar; Haukur Ingvarsson tekur viðtal við Sölva Björn Sigurðsson og brot er birt úr dagbókum Matthíasar Johannesen frá því um síðustu aldamót.

Úlfhildur Dagsdóttur kynnir lesendum upphaf Múmínheims Tove Janson í myndasögum, Hjálmar Sveinsson skrifar um svissneska rithöfundinn Robert Walser og birtir þýðingu á sögu eftir hann og þau Kristín Guðrún Jónsdóttir og Jón Thoroddsen þýða mexíkanska skáldið Alberto Blanco.

Hannes Hólmstein Gissurarson svarar Árna Björnssyni út af bók sinni Íslenskir kommúnistar en ritdómar eru eftir þær Soffíu Auði Birgisdóttur og Sigríði Albertsdóttur.

Leiðrétting

8. júní 2012 · Fært í Fréttir ·  

Í greininni Aflitaður sannleikur eftir þau Margréti Þ. Jóelsdóttur og Stephen Fairbairn féll niður tilvísun á heimasíðu listamannanna – www.margretandsteve.com – þar sem er að finna frekari upplýsingar um þau og verk þeirra.

Nýtt TMM

4. júní 2012 · Fært í Fréttir ·  

Annað hefti TMM á þessu ári er komið út og kennir þar margra grasa að vanda. Þeir Gísli Pálsson og Sigurður Örn Guðbjörnsson segja frá rannsóknum Jens Pálssonar á Íslendingum og þeirri grein mannfræðinnar sem hann stundaði og kennd hefur verið við  líkamsmannfræði. Grein þeirra heitir Homo islandicus. Algerlega ótengd henni er mögnuð smásaga eftir Steinar Braga, Hvíti geldingurinn…

Árni Finnsson formaður Náttúruverndarsamtakanna skrifar í tilefni af Ríó +20 ráðstefnunni um umhverfismál – mat á árangri tuttugu árum eftir Ríó-ráðstefnuna – sem haldin er nú í júní og rekur rysjótta samskiptasögu íslenskra stjórnvalda og frjálsra umhverfisverndarsamtaka.

Brynja Þorgeirsdóttir skrifar af um hina illu sæborg Gosa en Sigurður Pálsson skáld segir frá því hvernig leikritið hans Utan gátta varð til. Þorsteinn Antonsson hefur í grúski sínu fundið bréfaskipti Erlendar í Unuhúsi og kunningja og segir frá þeim en Brynhildur Þórarinsdóttir skrifar um minnkandi bóklestur barna og unglinga og bryddar upp á úrbótum á þeim vanda.

Þýðingar eru í heftinu eftir þá Óskar Árna Óskarsson og Atla Bollason og ljóð eftir Anton Helga, Kristian Guttesen og Stefán Mána.

Ari Trausti Guðmundsson ritar um föður sinn Guðmund frá Miðdal í tilefni af nýrri Listasögu og listamennirnir Margrét Þ. Jóelsdóttir og Stephen Fairbairn stinga niður penna af sama tilefni, en Árni Björnsson þjóðháttafræðingur hefur ýmislegt að athuga við bók Hannesar H. Gissurarsonar um Íslenska kommúnista.

Umsagnir eru að vanda: Úlfhildur Dagsdóttir skrifar um bók Guðrúnar Evu Mínervudóttur, Allt með kossi vekur, Atli Bollason skrifar um Bónusstelpuna eftir Rögnu Sigurðardóttur og Soffía Auður Birgisdóttir skrifar um bók Hallgríms Helgasonar Konuna við 1000°.

Nýtt TMM

27. febrúar 2012 · Fært í Fréttir ·  

TMM_1_2012_Kápufrontur

Komið er nýtt hefti af Tímariti Máls og menningar, 1. hefti 2012. Meðal efnis má nefna grein eftir Salvöru Nordal formann Stjórnlagaráðs þar sem hún segir frá störfum ráðsins, setur það í samhengi við störf Þjóðfundar og Stjórnlaganefndar og veltir fyrir sér umræðunni sem þarf að fara fram um breytingar á stjórnarskránni. Hallgrímur Helgason skrifar fjöruga grein um Guðrúnu frá Lundi og Dalalíf; Jón Karl Helgason ræðir þá Jónas og Bjarna en Snorri Páll Jónsson Úlfhildarson skrifar snarpa grein um óeirðirnar í London og orsakir þeirra. Allmikið er um skáldskap í heftinu: ljóð eftir Gerði Kristnýju, Sigurlín Bjarneyju Gísladóttur og Eyvind og sögur eftir Einar Má Guðmundsson, Guðmund Brynjólfsson og Rúnar Helga Vignisson. Aðalsteinn Ingólfsson listfræðingur skrifar um nýútkomna listasögu, Árni Bergmann um nýjar bækur þar sem þeir Elías Mar og Þórður Sigtryggsson koma við sögu og Fríða Björk Ingvarsdóttir fjallar ítarlega um þríleik Jóns Kalmans.

Og er þá fátt eitt talið.

TMM 4.11

9. janúar 2012 · Fært í Fréttir ·  

TMM_4_2011_kápaÍ fjórða og síðasta hefti ársins 2011 af Tímariti Máls og menningar eru áberandi greinar um umhverfismál. Guðmundur Páll Ólafsson náttúrufræðingur og rithöfundur og einn af helstu leiðtogum umhverfisverndarsinna hér á landi birtir erindi sem hann flutti á Umhverfisþingi 2011, Lífið er félagsskapur en Guðni Elísson prófessor við Háskóla Íslands skrifar ádrepu um válegt ástand loftslagsmála í heiminum og setur í það samhengi við væntanleg áform um olíuvinnslu á Drekasvæðinu. Lesa meira

Bókmenntaverðlaun Evrópusambandsins

9. desember 2011 · Fært í Fréttir ·  

Bókmenntaverðlaun Evrópusambandsins voru veitt í Brussel í þriðja sinn 28. nóvember síðastliðinn. Þá hlutu verðlaun höfundar frá tólf Evrópulöndum en áður höfðu höfundar frá 23 löndum hlotið verðlaunin, tólf árið 2009 og ellefu árið 2010. Ísland var í síðasta hópnum og tók Ófeigur Sigurðsson við verðlaununum fyrir Skáldsögu um Jón sem kom út hjá Máli og menningu í fyrra. Á næsta ári hefst þessi þriggja ára „hringur“ aftur en ekki er vitað hvort löndunum verður raðað eins í næstu umferð. Lesa meira

Nýtt TMM

25. febrúar 2011 · Fært í Fréttir, Óflokkað ·  

Út er komið fyrsta hefti ársins af tmm og kennir þar ýmissa grasa. Stærsta greinin er eftir Þorstein Þorsteinsson bókmenntafræðing og þýðanda og fjallar um Tímann og vatnið. Þarna gengur íslenskur ljóðrýnir loksins á hólm við þennan sögufrægasta ljóðaflokk 20. aldar og reynir að lesa hann eins vel og honum er unnt. Tímamótagrein.

Haukur Ingvarsson tekur stórt viðtal við Ófeig Sigurðsson sem vakti mikla athygli nú fyrir síðustu jól með skáldsögu sinni um Jón Steingrímsson og Tómas R. Einarsson skrifar um kúbanska skáldið Ernesto Padilla sem sætti ofsóknum kommúnistastjórnarinnar fyrir ljóð sín á sjöunda áratugnum.

Guðni Th. Jóhannesson veltir fyrir sér heimildum sagnfræðinnar í ýmsum skilningi – þ.e.a.s. hversu langt sagnfræðingnum er heimilt að ganga, hvernig hann á að umgangast heimildir sínar, hvað má birta og hvað má liggja. Önnur sagnfræðileg álitamál eru á ferð í grein Kjartans Ólafssonar fyrrverandi ritstjóra um nýjustu bók Þórs Whitehead og meintan vopnaburð kommúnista.

Hjörleifur Stefánsson fjallar um ýmis álitamál kringum íslenska torfbæinn en Ólafur Páll Jónsson heimspekingur tekur upp hanskann fyrir sumt í íslenskri umræðumenningu en gagnrýnir þó það sem hann nefndir „sæmdarþorsta“ Íslendinga.

Silja Aðalsteinsdóttir gerir upp síðasta leikár, ljóð eru eftir  Anton Helga Jónsson, Þórunni Valdimarsdóttur, Kristján Þórð Hrafnsson og Hallgrím Helgason og ritdóma skrifa þau Soffía Auður Birgisdóttir og Guðbjörn Sigurmundsson.

Fjórða hefti 2010 komið út

26. nóvember 2010 · Fært í Fréttir ·  

TMM_4_2010_Front_webKomið er nýtt hefti af Tímariti Máls og menningar.

Ólafur Jóhann Ólafsson birtir þrjú ljóð innblásin af dvöl í Flatey á Breiðafirði en þess má geta að hann kvaddi sér fyrst hljóðs í íslenskum bókmenntum á síðum tmm með þremur ljóðum árið 1978, sextán ára gamall.

Kristín Svava Tómasdóttir birtir nafnlaust ljóð en hún vakti mikla athygli ljóðaunnenda fyrir nokkrum árum með bók sinni Blótgælur, Sigurður Ingólfsson yrkir hækur um blómavasa sem Steinunn Sigurðardóttir skáldkona bað hann að geyma fyrir sig og Vésteinn Lúðvíksson yrkir um „bara ósköp venjulegt fjall“ – Esjuna.

Greinar um þjóðfélagsmál eru áberandi að þessu sinni í tímaritinu. Pétur Gunnarsson flutti á afmælisdegi Sigurðar Nordals fyrirlestur kenndan við hann og ber heitið „Ef ég gæti ekki elskað þessa þjóð“. Haukur Már Helgason heimspekingur og skáld beitir meðal annars tækjum sálgreiningar til að glöggva sig á ýmsum þverbrestum í sjálfsmynd íslensku þjóðarinnar í greininni „Að vera eyland“. Guðni Elísson beinir spjótum að nýfrjálshyggju í beittri grein sem heitir „Þegar vissan ein er eftir“ en Ásgeir Friðgeirsson notar reynslu sína sem innanbúðarmaður í bankakerfinu á útrásarárunum, ráðgjafi og talsmaður Björgólfsfeðga – og sem blaðamaður og ritstjóri áður – í forvitnilegri grein sem hefur að geyma greinargott yfirlit um það sem olli hruninu og umræðuna sem farið hefur fram um það. Gunnar Karlsson prófessor tekur svo upp hanskann fyrir fulltrúalýðræði í ádrepu.

Hrafn Jökulsson tvinnar saman söng Emiliönu Torrini, leigusala í rauðum slopp í húsi við Laugaveg, gamalli úrklippubók og örlögum samferðafólks í magnaðri frásögn; Heimir Pálsson skrifar af fræðilegu fjöri um Gunnlaðar sögu og Eddukvæði og Jón Yngvi Jóhannsson skrifar yfirlit um skáldsögur ársins 2009.

Ritdómar eru eftir Úlfhildi Dagsdóttur, Silju Aðalsteinsdóttur, Árna Bergmann, Úlfar Bragason, Magnús Sigurðsson og Inga Björn Guðnason.

Greinar um

Næsta síða »