Myndlistin um helgina
 |
| Þessa mynd gerði Svavar Guðnarson og hún hangir uppi í Listasafni Íslands núna. |
Í Listasafni Íslands stendur enn yfir Listahátíðarsýningin Vobra Reykjavík, og á morgun sunnudag kl. 14 verður sýnd heimildarmynd um danska myndlistarmanninn Ejler Bille eftir Jacob Jörgensen frá árinu 1999. Í myndinni er opinskátt viðtal við listamanninn þar sem hann segir frá lífshlaupi sínu og list. Í myndinni sést hann m.a. fara um söfn í Danmörku og segja frá verkum sínum og mörgum þeim heillandi sögum sem búa að baki. Sýning myndarinnar tekur 44 mín. og aðgangur er ókeypis.
Sýningin COBRA REYKJAVÍK er framlag Listasafns Íslands til Listahátíðar í Reykjavík 2007. Sýningin er sérstaklega sett saman fyrir Listasafn Íslands og sýningarmiðstöðina SilkeborgBad í Silkeborg í Danmörku.
Sýningarstjóri er Per Hovdenakk. Á sýningunni er 119 verk fengin að láni frá helstu söfnum á Norðurlöndunum eftir 29 listamenn, m.a. Asger Jorn, Egill Jacobsen, Ejler Bille, Carl-Henning Pedersen, Else Alfelt, Karel Appel, Constant, Corneille og Pierre Alechinsky.
Aðstoðarsýningarstjórar eru Harpa Þórsdóttir, Iben From og Lars Olesen.
Sýningin er í sölum 1, 3 og 4.
SVAVAR GUÐNASON Í LISTASAFNI ÍSLANDS
Salur 2 er tileinkaður Svavari Guðnasyni (1909-1988).
Í hópi Cobra-manna var Svavar fyrstur íslenskra listmálara til að leggja stund á frjálsa abstraktlist. Á sýningunni eru 15 verk eftir Svavar. Sýningarstjóri er dr. Ólafur Kvaran.
Sunnudaginn 24. júní kl.15 mun Júlíana Gottskálksdóttir verða með leiðsögn á sýningunni AÐ FLYTJA FJÖLL í Listasafni Árnesinga í Hveragerði. Á sýningunni eru verk eftir Ásgrím Jónsson til sýnis í samhengi við verk átta núlifandi myndlistarmanna, þeirra Brynhildar Þorgeirsdóttur, Georgs Guðna, Guðrúnar Kristjánsdóttur, Húberts Nóa, Magnúsar Pálssonar, Magnúsar Tómassonar, Ólafs Elíassonar og Þorbjargar Þorvaldsdóttur.
Júlíana mun ræða við gesti sýningarinnar um Ásgrím og verk hans á sýningunni. Júlíana er listfræðingur og núverandi forstöðumaður Listasafns Einars Jónssonar, en var áður forstöðumaður Safns Ásgríms Jónssonar og er höfundur bókarinnar Ljósbrigði, Safn Ásgríms Jónssonar. Hún ritaði einnig grein í sýningarskánna AÐ FLYTJA FJÖLL.
Listasafn Árnesinga er við Austurmörk í Hveragerði og er opið alla daga kl. 12 – 18 og er aðgangur ókeypis.
Gríðarlega góð aðsókn hefur verið að hinni fjölbreyttu og metnaðarfullu hönnunarsýningu Magma / Kvika sem nú stendur yfir á Kjarvalsstöðum, en frá því hún var opnuð á Listahátíð í maí síðastliðnum hafa um 8.500 gestir séð hana. Rúmlega 80 íslenskir hönnuðir eiga verk á sýningunni sem tengjast öllum sviðum hönnunar, s.s. húsgögnum, fatnaði, lýsingu, skartgripum, byggingarlist, vefnaði, tækninýjungum og matargerð. Í tengslum við sýninguna hefur verið efnt til fjölmargra viðburða, m.a. fimmtudagsstefnumóta við hönnuði sem notið hafa mikilla vinsælda.
- Næstkomandi sunnudag mun sýningarstjórinn og hönnuðurinn Guðrún Lilja Gunnlaugsdóttir taka á móti sýningargestum, leiða þá um sýninguna og svara spurningum sem kunna að vakna.
Guðrún Lilja hefur hlotið margvíslegar viðurkenningar fyrir hönnun sína hérlendis og erlendis og hefur hönnun hennar hlotið mikla athygli langt út fyrir landsteinanna. Guðrún Lilja vann til Sjónlistaverðlaunanna fyrir hönnun á síðasta ári og hefur verið útnefnd sem ein af helstu vonarstjörnum í hönnun af listatímaritinu Art Review.
Sýningarstjóraspjall Guðrúnar Lilju hefst kl. 15 og stendur yfir í um klukkustund.
Í D-salnum í Hafnarhúsinu var í vikunni opnuð sýning Daníels Björnssonar, en hann er fjórði efnilegi ungi myndlistarmaðurinn sem þar sýnir í þessari spennandi röð. Sýningarstjórinn hans er Ólöf K. Sigurðardóttir og sýningin stendur til 12. ágúst. Þann dag veður sýningarstjóraspjall kl. 15.
“Vekið ekki næturvörðinn að óþörfu“
Sjá Pistla …
„Vekið ekki næturvörðinn að óþörfu“
Í fallegu gömlu og endurgerðu fjósi vestast á Seltjarnarnesi er safn, sem lætur afskaplega lítið fyrir sér fara og er starfrækt nánast í kyrrþey. Lyfjafræðisafnið er við Neströðina, sem er hefðbundinn úthverfabotnlangi við fyrstu sýn en við enda hans er hin aldagamla og virðulega Nesstofa þaðan sem upphaf bæði formlegrar læknisfræði og lyfjafræði á Íslandi liggur. Frá Nesi er undrafagurt útsýni á góðum degi. Fjallahringurinn, allt frá Bláfjöllum, suður að Keili blasir við og svo til vesturs Snæfellsjökull og fjólubláu draumarnir, Akrafjallið og Skarðsheiðin. Krían gargar og fíflabreiðurnar brosa við sólinni þessa síðustu júnídaga.
Lyfjafræðisafnið er um margt sérstakt. Upphaf þess má rekja til nokkurra lyfjafræðinga sem tóku sig saman seint á áttunda tug síðustu aldar og hófu markvisst að safna munum og minjum tengdum apótekum og lyfjagerð á Íslandi. Fyrst voru hlutirnir geymdir í kjöllurum og ýmsum geymslum en fyrir nær tuttugu árum festu þeir kaup á gömlu útihúsunum við Nes á Seltjörn. Þeir stofnuðu sjálfseignarstofnun í kring um Lyfjafræðisafnið, sem er í eigu allra lyfjafræðinga á Íslandi og með endalausri sjálfboðavinnu og nokkrum glæsilegum peningagjöfum komu þeir sér upp safnahúsi í endurgerðu og viðbyggðu fjósinu. Húsið má teljast fullbyggt árið 1994 og þar eru nú í gamla húsinu aðalsýningarsalur safnsins á jarðhæð og þar fyrir ofan fundarsalur. Í nýja húsinu eru skrifstofur lyfjafræðinga, skrifstofa Lyfjafræðisafnsins, bókasafn lyfjafræðinga, viðgerðarstofa og stór geymslukjallari. Á neðstu hæð tengigangsins er einnig lítill sýningarsalur.
Í Lyfjafræðisafninu er geymt allt hugsanlegt, sem tengist lyfjum á Íslandi; áhöld, bækur, skjöl, myndir og hvaðeina, sem segir sögu lyfjamála á Íslandi. Í sýningarsölunum eru innréttingar úr gömlum apótekum og auðvelt er að gera sér grein fyrir hvernig vinnuaðstaðan var í apótekunum á þeim tíma þegar nær öll lyf, hverju nafni sem þau nefndust voru framleidd á staðnum. Það voru ekki einungis lyf sem framleidd voru í apótekunum heldur alls kyns efni önnur, m.a. fyrir gull- og silfursmiði, framkallarar fyrir ljósmyndara, hárlakk, alls kyns krydd og kryddblöndur, matarsódi og lyftiduft, fatalitir og bón svo fátt eitt sé nefnt. Sýnishorn af þessari fjölbreyttu framleiðslu apótekanna er til sýnis á safninu. Á einni leirkrúsinni, sem sannarlega er yfir hundrað ára gömul stendur meira að segja „Carry verum“ þ.e. alvöru karrý og það vottar enn fyrir fjarlægum ilmi úr krúsinni.
Í einum sal safnsins gefur að líta heilt apótek með öllu sem því fylgir. Þegar Iðunnar Apótek flutti af Laugarveginum fóru innréttingarnar í heilu lagi á Lyfjafræðisafnið og var þeim komið þar fyrir með og jafnvel apótekaralakkríslyktin fylgdi með. Að koma inn í Iðunnar Apótek er eins og að stíga áratugi aftur í tímann. Þar slær gamla klukkan á heila og hálfa tímanum og þar gefur að líta sýnishorn af vinsælum snyrtivörum og ilmvötnum fyrri áratuga, barnamat og sápur og óborganlegar sígarettur, sem reyktar voru að læknisráði við astma. Í kjallaranum gefur svo að líta alls kyns tæki og tól sem notuð voru í lyfjaframleiðslu í stærri stíl; töfluvélar og pillubretti, stykkpillupressur, kremtúpuáfyllara og vélina sem bjó til hinar alræmdu lýsipillur sem neyddar voru ofan í skólabörn á sjöunda og áttunda áratugnum, svo fátt eitt sé nefnt.
Á gamalt veggspjald, sem hangir á safninu og áréttar ákvörðun Apótekarafélags Íslands um að einungis séu afgreidd lyf að næturlagi eftir nýjum lyfseðlum, hefur verið ritað stórum stöfum eftirfarandi ákall: „Vekið ekki næturvörðinn að óþörfu.“ Það má kannski líta á þessa beiðni sem kaldhæðin áhrínsorð yfir Lyfjafræðisafninu því fram til þessa hefur það verið mjög lítið sótt og starfsemi þess farið lágt. Í tilefni af 75 ára afmæli Lyfjafræðingafélags Íslands var ákveðið að auglýsa safnið sérstaklega fyrir lyfjafræðingunum sjálfum og hvetja þá til að koma og skoða tækin og tólin sem fyrirrennarar þeirra notuðu á sinni starfsævi. Safnið er ekki síður áhugavert fyrir okkur hin, sem hafa bara kynnst apótekum og lyfjum sem notendur og neytendur. Safnið, húsið sjálft og ekki síst umhverfið í Nesi á Seltjörn er forvitnilegt, heillandi og afar friðsælt og tilvalinn áfangastaður í gönguferð út á Gróttu eða í bíltúr um grónar einbýlishúsagötur vestast á Seltjarnarnesi.
Þó svo að þið leyfið næturverðinum að sofa þá er um að gera að halda safnverðinum á Lyfjafræðisafninu við efnið í sumar. Safnið er opið á þriðjudögum, fimmtudögum, laugardögum og sunnudögum fram í ágústlok frá kr. 13.00 – 17.00. Aðgangur er ókeypis og öllum heimill. Nánari upplýsingar gefur Sólveig Ólafsdóttir safnvörður, s. 8921215.
Sólveig Ólafsdóttir
Allir þiggja O+
 |
Erla Þórarinsdóttir opnar sýningu í Gallerí Anima, Ingólfsstræti 8, föstudaginn 15. júní. Sýningin ber yfirskriftina O+.
Í kynningu segir: „Upphafið er sameiginlegt og mynd er minning, eða svo virðist það vera. O+ er blóðflokkur, sérstakur og sameiginlegur; við blóðgjöf geta allir þegið O+. Myndin leitar uppruna síns, minnið er gleymið og merkingin orðalaus.“
Verk Erlu eru máluð og svo silfurlögð þannig að silfrið myndar skúlptúral form sem ummyndast í ljósi tímans.
Sýningin stendur til 1. júlí og er galleríið opið miðvikudaga – laugardaga kl. 14 – 17.
Skiptir fagurfræðin máli?
 |
Ráðstefna um börn og menningu í haust
25.-28. október 2007 í Hótel Örk, Hveragerði.
Við bjóðum ykkur velkomin á ráðstefnu BIN-Norden og Norrænu ráðherranefndarinnar; Börn og menning – skiptir fagurfræðin máli?
Ráðstefnan er vettvangur fyrir miðlun þekkingar, þvert á fag-, rannsóknar- og miðlunarhefðir. Hún vill leiða saman greinar, búa til samtal milli félagsvísinda og hugvísinda og skoða félags-, menningar- og fagurfræðilega nálgun að börnum og menningu. Í þetta sinn er fagurfræðin miðlæg og horft sérstaklega á samband hins félagslega og fagurfræðilega.
Markmið ráðstefnunnar er að skoða hvað fræðin segja um merkingu fagurfræðinnar í hversdagsveruleika barna og fjölmiðlum, list og menningu fyrir börn. Gengið er út frá því að hugtakið (barna) menning geti lagt línur bæði fyrir rannsóknir og miðlun. Megin umræðuefnin eru þessi:
- Hvernig er fagurfræði skilgreind, eða hið fagurfræðilega?
- Hvaða skilgreiningar á merkingu fagurfræði eru notaðar í sögu, félagsfræði, sálfræði, mannfræði, menntunarfræði, þjóðfræði, fjölmiðlafræði og menningarfræðilegum rannsóknum á þessu sviði?
- Hver eru tengslin á milli fagurfræði og samfélags?
- Hvaða hlutverki gegnir hið fagurfræðilega í bókmenntum, leikhúsi, dans, list, tónlist, kvikmyndum og annarri fjölmiðlun sem beint er að börnum?
Þema og undirþemu. Þar sem yfirskipað þema ráðstefnunnar er viðamikið skiptist ráðstefnan í tvö undirþemu sem þáttakendur geta miðað fyrirlestra sína við. Þau eru: Merking fagurfræði í menningu barna annars vegar og Merking fagurfræði í menningu (fullorðinna) fyrir börn hins vegar.
Alls konar nálgun að efninu – félagsleg, sálfræðileg, fagurfræðileg, menntunarfræðileg, menningarleg, heimspekileg og söguleg – er vel þegin. Báðum undirþemum fylgja nokkur stikkorð. Þau geta verið til marks um það um hvað er hægt að tala í fyrirlestrunum en eru hvorki tæmandi né bindandi. Notið ímyndunaraflið!
Fyrirlestrar – útdráttur. Ef fyrirlestur er boðinn fram á ráðstefnuna skal fyrst senda útdrátt á einni A4 síðu (500 orð)
Útdrátturinn skal
1. falla undir annað af tveimur undirþemum ráðstefnunnar.
2. lýsa megin viðfangsefnum og sjónarhornum væntanlegs fyrirlestrar
3. segja á hvaða tungumáli (sænska, norska, danska, enska) hann verður fluttur og hvort notað verður „power point“eða glærur.
Útdrátt skal senda inn fyrir 15. júní 2007.
Sagt verður til um hvort fyrirlestur er samþykktur eða honum hafnað 2-6. júlí 2007.
Allir útdrættir verða aðgengilegir á heimasíðu Bin-Norden www.bin-nordn.net á ensku og skandinavískum málum áður en ráðstefnan er sett. Eftir ráðstefnuna er hægt að þróa fyrirlestrana áfram og ganga frá greinum sem verður ritstýrt og þær ritrýndar áður en þær birtast á netsíðu BIN. Greinar sem þannig birtast, ásamt greinum frá tveimur fyrri ráðstefnum BIN-Norden verða hluti af fyrirhugaðri bók um norræna barnamenningu.
Gestir ráðstefnunnar þurfa að skrá sig á heimasíðu ráðstefnunnar fyrir 1. september.
Tungumál ráðstefnunnar eru skandinavísku málin en fyrirlestrar á ensku verða samþykktir. Fyrirlestrar og umræður munu að mestu leyti fara fram á skandinavískum málum.
Skipuleggjendur eru Norræna ráðherranefndin og barnamenningarfræðingar á norðurlöndum (BIN). Ráðstefnan er styrkt af Rannsóknarráðinu fyrir menningu og miðlun.
Heimilisfang. Útdrættir skulu sendir rafrænt eða bréflega til ritara verkefnisins:
BIN-Norden
Danmarks Biblioteksskole
Birketinget 6
2300 København S
E-mail: bin@db.dk
Sjá einnig heimasíðu BIN www.bin-norden.net
Ólöf Arnalds á Gljúfrasteini á 17. júní
 |
Á sunnudaginn kemur verður aftur skipt úr klassíska gírnum á stofutónleikum Gljúfrasteins því þá mun Ólöf Arnalds flytja lög af nýútkominni hljómplötu sinni. Platan ber titilinn Við og við og hefur að geyma þjóðlagaskotna melódíska popptónlist. Sem fyrr hefjast tónleikarnir klukkan 16.00 og aðgangseyrir er aðeins 500 krónur.
Ólöf Arnalds er fædd í Reykjavík 4. janúar 1980. Hún hóf tónlistarnám árið 1986 í Tónmenntaskóla Reykjavíkur og lærði þar á fiðlu hjá Hrönn Geirlaugsdóttur. Einnig söng hún hlutverk Kalla í barnaóperunni Kalla og sælgætisgerðinni eftir Hjálmar H. Ragnarsson, sem flutt var 1993 í tilefni af 40 ára afmæli Tónmenntaskólans. Ólöf hóf nám við Tónlistarskólann í Reykjavík árið 1996 og nam þar söng undir handleiðslu Ruthar Magnússon. Hún lauk stúdentsprófi af tónlistarbraut frá Menntaskólanum við Hamrahlíð vorið 2000. Ólöf lauk B.A. gráðu í tónsmíðum og nýmiðlun frá Listaháskóla Íslands vorið 2006. Lokaverk hennar, myndbandstónverkið Eins og sagt er var frumsýnt í Íslensku óperunni við mjög góðar undirtektir. Vegna fjölda áskorana var verkið tekið til sýningar um nokkurt skeið í Þjóðmenningarhúsinu í kjölfar sýningar hússins á því á Menningarnótt. Fyrsta sólóplata Ólafar, Við og við, kom út hjá 12tónum í febrúar og hefur hlotið frábærar viðtökur og einróma lof gagnrýnenda. Ólöf hefur í gegnum tíðina unnið með mörgum þekktum íslenskum tónlistarmönnum og hljómsveitum. Mætti þar helst nefna Skúla Sverrisson, múm, Slowblow og Mugison.
Guðmundur fékk smásagnaverðlaunin
 |
| Guðmundur Ólafsson – verðlaunasaga hans verður birt í TMM í haust. |
í samkeppni MENOR og TMM
Smásagnasamkeppni MENOR og TMM var auglýst í fyrsta hefti TMM í ár og rann frestur út 1. maí. 53 handrit bárust og var dómnefndin hæstánægð með árangurinn. Komu handrit alls staðar að af landinu og einnig frá Norðurlöndum og Bretlandi. Baráttan var hörð um efstu sætin og lauk svo að þrjár sögur voru verðlaunaðar með veglegri bókagjöf frá Eddu útgáfu. Fyrstu verðlaun hlaut Guðmundur Ólafsson, leikari, leikskáld og rithöfundur fyrir söguna “Yfirbót”. Hún verður birt í hausthefti TMM. Önnur verðlaun hlaut Arndís Þórarinsdóttir fyrir “Hnupl” og þriðju verðlaun hlaut Reynir Hjartarson fyrir söguna “Hefnd – eða fyrirgefning?” Þær verða líka birtar í TMM.
Guðmundur Ólafsson (f. 1951) er á þessari stundu einkum þekktur fyrir sinn frábæra einleik Tenórinn sem hann bæði semur og leikur, og hefur gengið og gengið í Iðnó, Borgarleikhúsinu og víða um land, en hann hefur gert ótalmargt fleira um ævina og er ekki ókunnugur verðlaunum. Fyrir sína fyrstu barnabók, Emil og Skunda fékk hann Íslensku barnabókaverðlaunin 1986, og þau hlaut hann aftur 1998 fyrir Heljarstökk afturábak. Auk þess hefur hann fengið smásagnaverðlaun Samtaka móðurmálskennara (1984) og Vikunnar (1998). Guðmundur hefur samið nokkur leikrit, bæði fyrir svið, sjónvarp og útvarp, þýtt fjölda verka og verið meðal ástsælustu leikara landsins af sinni kynslóð.
Arndís Þórarinsdóttir (f. 1982) hefur líka látið til sín taka á ritvellinum undanfarin ár og er með meistaraprófsgráðu í leikritun frá Bretlandi. Hún átti smásögu í TMM í hittifyrra (TMM 1/2005), og á menningarnótt í fyrra var smásagnahefti eftir hana dreift í strætisvagna borgarinnar, mörgum til ómældrar skemmtunar vikurnar á eftir. Í vor var hún svo leiklistarráðunautur Þorleifs Arnar Arnarssonar og Andra Snæs Magnasonar í hinni dýrlegu sýningu Eilíf hamingja sem Hið lifandi leikhús sýndi í Borgarleikhúsinu.
Samvinna TMM og MENOR – Menningarsamtaka Norðlendinga – hefur nú staðið í þrjú ár eða síðan 2005. Fyrsta árið snerist samkeppnin um örsögur og sigraði Sigurlín Bjarney Gísladóttir með sögunni “Hún stormaði um í sjóstormi um hafið” (sjá TMM 3 2005). Í fyrra var beðið um þulu eða rapptexta og þá varð Þorsteinn G. Þorsteinsson hlutskarpastur með “Fjallaþulu” (sjá TMM 3 2006). Sjálf hafa Menningarsamtökin staðið fyrir samkeppni á sviði ritaðs máls í tuttugu ár eða frá 1987 í samstarfi við ýmsa aðila.
Í dómnefnd sátu nú Hólmfríður Andersdóttir bókasafnsfræðingur og Björn Teitsson íslenskufræðingur fyrir MENOR og Þorleifur Hauksson íslenskufræðingur fyrir TMM.
Leikur einn
 |
| Meðal verka á hátíðinni er The Secret Face eftir Elísabetu Jökulsdóttur. Pálína Jónsdóttir leikur ein. |
Leiklistarhátíðin ACT ALONE 2007 verður haldin á Ísafirði 27. júní – 1. júlí. Aðgangur er ókeypis.
Dagskrá
Miðvikudagur 27. júní, Kl. 20. Alþýðuhúsið. Setning Act alone 2007. Opnunarsýning:
LEIKUR EINN. Heimildarmynd. Framleiðandi: digi-Film. Handrit og leikstjórn: Jóhannes Jónsson.
Í þessari heimildarmynd er litið inn á alþjóðlegu leiklistarhátíðina Act Alone sem haldin er árlega á Ísafirði og skyggnst inn á það svið leikhússins sem einleikur kallast. Reynt er að öðlast innsýn í einleiksformið og fá svör við ýmsum spurningum; hvað felst í hugtakinu einleikur? hvernig finnst mönnum að glíma við þetta form? – og ekki síst: hvert er vægi hans í tilveru leikhúsins? Rætt er við aðstandendur hátíðarinnar og þáttakendur.
Leikur einn var sýnd í Sjónvarpinu síðastliðið haust og á kvikmyndahátíð á Egilsstöðum í vetur. Myndin var gerð árið 2005 meðan Act alone hátíðin stóð yfir og eru sýnd brot úr einleikjum á borð við Gísla Súrsson og Ferðir Guðríðar.
Kl. 21.00 Hamrar. Léttar leikhúsveitingar og einleikin stemning.
Kl. 21.15 Hamrar. Kokteilleikhús. Sýndir verða tveir stuttir einleikir:
NEFNDARFORMAÐURINN. Litli Leikklúbburinn. Leikari: Árni Ingason. Höfundur: Benóný Ægisson. Leikstjórn: Elfar Logi Hannesson.
,,Þegar kemur að nefndarstörfum kalla ég ekki allt ömmu mína. Ég hef meðal annars verið í búfjárveikivarnarnefnd og margur kjúklingurinn hefur fallið í valinn að fyrirmælum mínum…”
ÁLITSGJAFINN. Litli Leikklúbburinn. Leikari: Marta Sif Ólafsdóttir. Höfundur: Benóný Ægisson.
Leikstjórn: Elfar Logi Hannesson.
,,É..
Ég…
Ég er…
..kolgeit..
…kolgeit-kona…
Ég er kolgeit-kona”
Fimmtudagur 28. júní. Kl.13.30 – 16.00 Háskólasetur Vestfjarða. Leiklistarnámskeið
BRÚÐULEIKHÚS. Kennari: Helga Arnalds, brúðuleikari. Tími: 28. júní – 30. júní. Kennslustundir: 9þ Verð: 10. þúsund. Taka þátt: Sendið tölvupóst á komedia@komedia.is.
Við lifum á tímum sem einkennast af nálgun, samruna og hverfandi landamærum. Allt má blanda saman nýju og gömlu, myndlist, orðum tónlist, leiklist, kvikmyndalist og dansi. Allar greinar listarinnar hafa orðið fyrir áhrifum af þessum straumum. Brúðuleikhús er kannski sú listgrein sem hefur orðið fyrir mestum breytingum á stuttum tíma. T.d. var litið á það sem fúsk eða stórslys - ef ekki beinlínis klúrt – ef sást í brúðustjórnanda fyrir svona 30 árum. En þetta skref fram fyrir skerminn leysti nýja krafta úr læðingi og kom af stað spennandi ferli.
Hvert tímabil á sér sínar forsendur og það var sú tíð að brúða sem hreyfðist, að því er virtist af sjálfu sér, var galdri líkust, en í dag – á tímum tölvunnar – er galdurinn fólginn í öðru en hreyfitæknni brúðunnar. Nú er kveikjan að galdurinn er fólginn meira í sambandinu milli brúðu og leikara. Milli efnis og anda. Myndmál er að sækja á gagnvart orðinu og leiksýningar smám saman að verða myndrænni. Snertipunktur myndlistar og leiklistar er að verða meira áberandi og enmitt á þessum snertipunkti er brúðuleikhúsið.
Á námskeiðinu gerir hver þátttakandi eina brúðu sem getur verið hans “alter ego” eða æðra sjálf hluti af honum sjálfum. Hans besta, versta ósýnilegasta, draumkenndasta hlið sem hann myndgerir og tjáir með brúðunni.
Helga Arnalds hlaut menntun sína í leiklistarháskólanum Instituto del Teatro í Barcelona og í leiklilstarháskólanum DAMU í Prag. Hún stundar nú myndlistarnám við Listaháskóla Íslands. Helga hefur rekið leikhúsið 10 fingur í ein 12 ár en auk þess hefur hún leikstýrt, hannað búninga, brúður og grímur fyrir ýmis leikhús og sjónvörp.
EINLEIKUR. Kennari: Ole Brekke, skólastjóri The Commedia School í Danmörku. Tími: 28. júní – 30.júní. Kennslustundir: 9. Verð: 10 þúsund krónur. Taka þátt: Sendið tölvupóst á komedia@komedia.is.
Að leika einn þýðir að þú hefur ekki mikla valmöguleika á því hver meðleikari þinn verður í verkinu. Þeir einu sem eru með þér eru áhorfendur, hópur fólks sem gæti gert hvað sem er. Hópur sem þú þekkir ekki vel og að auki er nýr hópur hverju sinni. Maður þarf að geta svarað sjálfkrafa og skapandi til hvers nýs hóps, til að geta leikið með og án mannfjöldans með þeirra viðbrögðuðm gagnvart þínu verki. Þetta námskeið mun kenna þér brögð til að framkalla þá næmni og hvittni og hjálpar þér við að líða vel í þessari einmannalegu stöðu þessarar óvissu.
Ole Brekke hefur áralanga reynslu af einleiknum bæði sem leikari og kennari. Hann starfrækir eigin leiklistarskóla, The Commedia School, í Kaupmannahöfn í Danmörku. Látbragð, trúðsleikur og kómedíuleikur er í aðalhlutverki í skólanum. Ole Brekke hefur gert garðinn frægan sem trúðurinn Otomoto sem hefur skemmt börnum á öllum aldri víða um heim. Otomoto verður á dagskrá Act alone í ár en hann var einnig gestur hátíðarinnar í fyrra. Nú snýr hann aftur með splunkunýtt ævintýri Otomoto.
Kl. 17.00 Austurvöllur
AUMINGJA LITLA LJÓÐIÐ. Kómedíuleikhúsið. Leikari: Elfar Logi Hannesson. Höfundur: Hallgrímur Oddsson.
Er ljóðið dautt? Þessi klassíska spurning hefur verið lífseig í gegnum árin og er höfundi verksins tilefni til vangaveltna um stöðu ljóðlistarinnar í nútíma samfélagi. Í verkinu er saga ljóðlistarinnar rakin í stuttu máli allt frá upphafi til nútímans. Fjölmörg ljóð eru í leiknum og eru þau öll sótt í smiðju vestfirskra skálda og má þar nefna Stein Steinarr, Jón úr Vör, Steingerði Guðmundsdóttur og Guðmund Inga Kristjánsson.
Kl.20.00 Edinborgarhúsið
THE SECRET FACE. Leikari: Pálína Jónsdóttir. Höfundur: Elísabet Jökulsdóttir. Leikmynd: Árni Páll Jóhannsson. Tónlist: Hilmar Örn Hilmarsson. Búningar: Filippía Elísdóttir. Kvikmynd: Elísabet Rónaldsdóttir. Leikstjórn: Steinunn Knútsdóttir.
The Secret Face eða Blinda kindin eftir Elísabeti Jökulsdóttur er ævintýraleg tragíkómedía um ástfangna konu sem er að bíða eftir ,,heimspressunni.”. Á mörkum draums og veruleika í landslagi náttúru og margmiðlunnar takast á gleði og martröð persónunnar sem renna saman í stórbrotið sjónarspil.
Kl. 22.00 Hótel Ísafjörður
Kaffileikhús. EINLEIKIN KONA. STEINGERÐUR GUÐMUNDSDÓTTIR.
Dagskrá um Steingerði Guðmundsóttur sem sérhæfði sig í einleiknum og lék marga leiki hér á landi á síðustu öld. Steingerður var fjölhæf listakona hún samdi leikrit, ljóð og var einnig leiklistargagnrýnandi um tíma. Jóna Símonía Bjarnardóttir flytur erindi um Steingerði og Elfar Logi Hannesson. Síðast en ekki síst verður fluttur útvarpseinleikur eftir og með Steingerði Guðmundsdóttur. Leikurinn er fluttur í samstarfi við Útvarpsleikhúsið.
Föstudagur 29. júní
Kl.12.00 Hótel Ísafjörður
Hádegisleikhús. Sýndir verða leikirnir:
UM SKAÐSEMI TÓBAKSINS. Litli Leikklúbburinn. Leikari: Ársæll Níelsson. Höfundur: Anton P. Tsjekhov. Leikstjórn: Elfar Logi Hannesson.
,,Heiðruðu dömur, og á sína vísu, heiðruðu herrar. Þess hefur verið farið á leit við konu mína, að ég flytti hér einskonar alþýðlegan fyrirlestur til styrktar góðu málefni.”
LOVERMAN. Litli Leikklúbburinn. Leikari og höfundur: Hallgrímur Hróðmarsson. Leikstjórn: Elfar Logi Hannesson.
,,Ég má ekki vera of áberandi í kvöld. Ekki datt mér í hug hér fyrir þremur árum þegar ég kom hingað vestur að ég ætti eftir að taka þátt í þessu.”
Kl. 13.30 Hamrar
PÍLA PÍNA. Leikari: Þórunn Arna Kristjánsdóttir. Höfundur: Kristján frá Djúpalæk. Tónlist: Heiðdís Norðfjörð.
Klassíkt ævintýri um músina Pílu Pínu sem fer í ævintýraleit.
Kl. 14.30 – 16.30 Háskólasetur Vestfjarða
Leiklistarnámskeið – dagur tvö. Brúðuleikhús. Einleikur
Kl. 17.00 Hamrar
Tvíleikin gestasýning: Hrafnkelssaga Freysgoða. Stoppleikhópurinn. Leikarar: Eggert Kaaber, Sigurþór A. Heimisson. Leikgerð og leikstjórn: Valgeir Skagfjörð. Leikmynd og búningar: Vignir Jóhannsson.
Hrafnkelssaga Freysgoða eða Hrafnkatla, er í hópi þekktustu Íslendingasagna. Þar segir frá því þegar Hrafnkell Freysgoði drepur Einar Þorbjarnarson smalamann fyrir þá sök að ríða hestinum Freyfaxa í leyfisleysi. Í kjölfarið stefnir Sámur Bjarnason Hrafnkeli fyrir vígið og dregur það mál mikinn dilk á eftir sér.
Kl. 20.00 Edinborgarhúsið
OTOMOTO: The Authority – Gestasýning frá Danmörku. Leikari og höfundur: Ole Brekke.
Lífi nútímanns er stjórnað og mótað af yfirvöldum. Hmmm? Það er það sem yfirvöldin vilja trúa. En við vitum öll að okkar lífi er stjórnað og mótað af mistökum, misskilningi, að ,,fatta ekki djókið” og öðrum óhöppum. Þetta veit hvert mannsbarn. Þessvegna hafa þau gaman af trúðnum Otomoto. Fullorðnir munu einnig skemmta sér og kannast við ýmis kunnugleg óhöpp sem Otomoto verður fyrir á leið sinni til að spila á tónleikum.
Kl. 22.00
AÐ LEIKA EINN. Málþing um einleikjaformið.
Laugardagur 30. júní
Kl. 10.00 – 12.00 Háskólasetur Vestfjarða
Leiklistarnámskeið – lokadagur. Brúðuleikhús. Einleikur.
Kl. 13.00 Hamrar
MR TROSS – Gestasýning frá Eistlandi. Leikari og höfundur: Toomas Tross. Leikstjórn: Haide Mannamae.
Mr Tross er atvinnu leikhúsræstitæknir og er mjög stoltur af starfi sínu. Hann hefur verið ráðinn til að þrífa Hamra að lokinni sýningu en ákveður að mæta soldið fyrr og sjá sýninguna. Tross mætir síðastur í salinn og á í erfiðleikum með að finna sér sæti því hann var ekki búinn að panta miða. Á einhvern undarlegan hátt endar hann uppá leiksviði og er þar staddur í sviðsljósinu. Auðvitað halda allir að hér sé leikari sýningarinnar og fáa grunar að hann sé ræstitæknir. Mr Tross þykir mjög vænt um áhorfendur og þar sem hann er nú einu sinni kominn á sviðið þá ákveður hann að sýna Ræstitæknaleikritið. Hann galdrar, syngur og sýnir fimleika. Allt fyrir áhorfendur sem hann elskar og vonast um leið til að vera dáður af þeim.
Kl. 14.30
SMJÖRBITASAGA. Sögusvuntan. Leikari, höfundur, brúður og leikmynd: Hallveig Thorlacius.
Leikstjórn: Brynja Benediktsdóttir.
Leikurinn fjallar um strákinn Smjörbita og Gullintanna hundinn hans. Þeir eru gráðugir í nýsteiktar kleinur og það verður Smjörbita litla dýrkeypt, þegar stærðarinnar tröllskessa kemur arkandi ofan úr fjöllunum í leit að strák í súpu handa dóttur sinni. Hún platar hann til fjalla. Þá verða áhorfendur að beita ýmsum brögðum til að Smjörbiti lendi ekki í súpupottinum hennar….
Sýningin hefur ferðast um hálft Grænland þar sem Smjörbiti gengur undir nafninu Punniminneq.
Kl. 16.00 Hamrar
SÓLARSAGA. Leikhúsið Tíu fingur. Leikari, handrit, brúður: Helga Arnalds. Tónlist: Eyþór Arnalds. Leikstjórn: Helga Braga Jónsdóttir
Sagan er fléttuð úr þjóðsögum af sólinni frá ýmsum löndum. Hún gerist fyrir langa löngu. Þegar Sólin var bæði fögur og feit, hnöttótt og heit og einstaklega hláturmild. Á hverjum morgni sungu dýrin og mennirnir sólarsöngin svo jörðin snérist í hringi af gleði. En á annarri plánetu í sólkerfinu bjó Hnetukonungurinn ásmat Plágu litlu prinsessu. Kónginum þótti svo vænt um dóttur sína að hann gat ekki neitað henni um neitt. En Plága prinsessa átti afmæli og vasalings kónginum kom ekkert í hug til að gefa henni sólina. Það er á þessu andartaki í sögunni sem kemur í hlut okkar áhorfendanna að sýna hvað í okkur býr því ekki getum við látið dýrin á jörðinni krókna úr kulda. Eins og í öðrum sýningum leikhússins taka börnin virkan þátt í sögunni og ekki stendur á þeim að bjarga heiminum á einum morgni eða eftirmiðdegi.
Kl. 17.00 Hamrar
EINN Á SVIÐI. Fyrirlestur. Elfar Logi Hannesson fjallar um nokkra fræga einleikara þar á meðal Dave Allen, Eric Bogosian og Ruth Draper.
Kl. 20.00 Hamrar
ÞRYMSKVIÐA OG IÐUNNAREPLIN. Stoppleikhópurinn. Leikari: Eggert Kaaber. Leikgerð: Eggert Kaaber, Katrín Þorkelsdóttir. Leiktjöld: Edwin Kaaber. Leikmunir: Guðrún Öyahals.
Leikstjórn: Margrét Kaaber.
Byggir á sögunum um Iðunni og eplin og Þrymskviðu. Leikverkið er litrík ævintýraferð um heim norrænnar goðafræði en markmiðið með sýningunni er að kynna fyrir börnum helstu sögupersónur goðafræðinnar ásamt þekktustu sögubrotum hennar.
Þrymskviða segir frá því þegar hamri Þórs, Mjölni, er stolið. Eftir bollaleggingar Þórs og Loka heimsækir Loki síðan Jötunheima. Þar kemst hann að því að eina leiðin til að fá hamarinn Mjölni til baka er að Freyja gangi að eiga Þrym. Þetta tekur Freyja ekki í mál og upphefst þá spennandi atburðarás því Þór og Loki ákveða að dulbúa sig sem Freyja og fylgdamey hennar.
Iðunn og eplið segir frá því þegar Loki tælir Iðunni burt úr Ásgarði til Miðgarðs. Þar birtist jötuninn Þjasi, í Arnarlíki, og nemur hana á brott. Allt er í upplausn í Ásgarði því án Iðunnar og eplanna eldast goðin og deyja en jötnar munu lifa að eilífu.
Kl.22.00 Hamrar
SKRÍMSLI. Kómedíuleikhúsið. Leikari: Elfar Logi Hannesson. Höfundur: Pétur Eggerz. Tónlist og hljóðmynd: Guðni Franzson. Skrímslateikningar: Marsibil G. Kristjánsdóttir. Leikmynd: Pétur Eggerz. Leikstjórn: Pétur Eggerz.
Frá örófi alda hafa skrímsl af ýmsum toga reglulega sést í sjó og vötnum á Íslandi og frásögur af samskiptum þeirra við landsmenn frá fyrstu öldum Íslandsbyggðar fylla heilu ritsöfnin. En hverjar eru þessar dularfullu verur, hvar er þær helst að finna og hvernig er best að bera kennsl á þær?
Þessum spurningum svarar skrímslafræðingurinn Jónatan Þorvaldsson og setur um leið fram óvéfengjanlegar sannanir fyrir tilvist skrímsla í sjó og vötnum á Íslandi.
Sunnudagur 1. júlí
Kl. 14.00 Félagsheimilið Þingeyri
HÖLL ÆVINTÝRANNA. Möguleikhúsið. Leikari og höfundur: Bjarni Ingvarsson. Leikmynd, búningar og leikgerfi: Katrín Þorvaldsdóttir. Tónlist: Jónas Þórir. Leikstjórn: Sigurður Sigurjónsson
Sagnaþulur nokkur á stefnumót við áhorfendur. Í farteskinu hefur hann sögur og ævintýri sem hann færir í leikrænan búning á einfaldan hátt. Geiturnar þrjár trítla yfir brúna þar sem tröllið ógurlega liggur í leyni, undurfögur höll býr yfir ótal ævintýrum og haltur hani svífur um loftin blá á vængjum ímyndunaraflsins.
Hér er á ferðinni leiksýning fyrir áhorfendur á aldrinum 2ja til 8 ára þar sem börnin fá að taka virkan þátt í atburðarásinni og gleyma sér í heimi ævintýranna um stund.
Kl.15.30 Félagsheimilið Þingeyri
ÉG LÍT Í ANDA LIÐNA TÍÐ. Leikari og höfundur: Guðrún Ásmundsdóttir. Sópran: Alexandra Chernschova. Baritone: Þórhallur Barðason. Undirleikur: Sigríður Ragnarsdóttir.
Guðrún Ásmundsdóttir er einn ástsælasti listamaður okkar og hefur frá mörgu að segja. Hún er sögumaður af guðs náð og í þessari sýningu segir hún frá því þegar hún kom í leikferð á Ísafjörð fyrir 40 árum með leikritið Ævintýri á gönguför. Með í för voru Ísfirðingarnir Brynjólfur Jóhannesson og Áróra Halldórsdóttir sem sögðu henni frá leikhúsinu á Ísafirði og þar kynntist hún einnig leikkonunni Sigrúnu Magnúsdóttur. Inn í sögu þeirra verður fléttuð saga Sigvalda Kaldalóns, þegar hann lifði og starfaði sem læknir að Ármúla við Ísafjarðardjúp. Karl Oluf Bang fóstursonur Sigvalda kemur einnig við sögu í leiknum. Hér er á ferðinni einstakt söguleikhús sem enginn ætti að missa af.
Kl. 17.00 Félagsheimilið Haukadal í Dýrafirði
VESTFIRSKIR EINFARAR. Myndlistarsýning á verkum eftir listahjónin Gunnar Guðmundsson og Guðmundu Jónu Jónsdóttur frá Hofi í Dýrafirði. Bæði fóru sínar eigin leiðir í listinni og eru því í hópi svonefndra einfara í hinum íslenska myndlistarheimi.
Kl. 17.30 Félagsheimilið Haukadal í Dýrafirði
Söngvar fyrir börn. Höfundur og flytjandi: Þórarinn Hannesson
Þórarinn Hannesson hefur verið viðloðandi tónlist í hartnær 30 ár og komið fram sem söngvaskáld með sitt eigið efni í 20 ár. Í þessari dagskrá fyrir börn á öllum aldri flytur hann eigin lög og texta sem og ljóð sem fjalla um uppvaxtarár hans á Bíldudal. Einnig mun hann flytja eigin lög við texta eftir skáldið og uppfræðarann Herdísi Egilsdóttur sem gefin verða út á geisladiski í sumar til styrktar Regnbogabörnum. Textarnir fjalla um hinar ýmsu dyggðir t.d. Traust, Tryggð, Vinsemd, Ábyrgð og Þolinmæði. Ber diskurinn nafnið Ég vinur þinn er.
Hátíðarlok.
Nýjar bækur og tímarit
 |
Sjá Á líðandi stund http://www.tmm.is/default2.asp?strAction=getPublication&intPublId=970
Nýjar bækur og tímarit
 |
 |
 |
Ég byrjaði á skáldskapnum í Skírni, las mér til ánægju ljóð Kristínar Svövu Tómasdóttur, Óttars M. Norðfjörð og Kristínar Eiríksdóttur og flissaði að “einrömmungum” Hugleiks Dagssonar, en þegar ég kom að smásögu Steinars Braga, “Kristalsgíraffanum”, þá varð ég einkennileg innan um mig. Mér fannst ég vera að lesa Karen Blixen – og ekki hvaða bók sem er heldur mína eftirlætisbók eftir hana, Syv fantastiske fortællinger! Ekki það að Steinar Bragi sæki til hennar hugmyndir, hér er nútíminn undir, grimmur og margslunginn, en þetta er göldróttur texti á furðulega svipaðan hátt og hjá Blixen. Frábær saga.
Annað sem ég hafði gaman af að lesa í Skírni var “Óðinn, Þór og Egill” eftir Heimi Pálsson sem birtir mér allt aðra ímynd guðanna Óðins og Þórs en ég á að venjast. Mjög sannfærandi. Ástarjátning Einars Más Guðmundssonar til Halldórs Laxness var líka skemmtileg og sannfærandi en hefði kannski notið sín betur á öðrum vettvangi en þessum. Einar á erindi við fólk sem er ókunnugra Laxness en venja er með Skírnislesendur. En textinn er sjarmerandi og skiljanlegt að ritstjórinn, Halldór Guðmundsson, hafi fallið fyrir honum. Hrafnhildur Schram skrifar um myndlistarmann Skírnis sem að þessu sinni er Eyborg Guðmundsdóttir, merkur myndlistarmaður sem féll frá á miðjum aldri og hefur orðið útundan í umfjöllun um þróun myndlistar hér á landi eins og Hrafnhildur sýnir fram á.
Ég hef lengi haldið mikið upp á sjálfsævisögu Hannesar Sigfússonar og mér finnst Gunnþórunn Guðmundsdóttir gera henni skínandi góð skil í grein sinni, “Sjálf í frásögn”. Hún þrýstir fingri á það sem gerir sögu Hannesar einkennilega heillandi í dapurleika sínum þegar hún segir ævisagan sé um það “‘af hverju ég varð ekki stórskáld’” og bætir við: ”að því leyti sker hún sig úr fjölmörgum íslenskum og erlendum sjálfsævisögum skálda.”
Í bókmenntatímaritinu Stínu er jafnvel ennþá meira um hákarla í ritlistinni en í Skírni, hver verðlaunahöfundurinn rekur þar annan – Hallgrímur Helgason, Ingibjörg Haraldsdóttir, Thor Vilhjálmsson, Sigurbjörg Þrastardóttir … Það er von að ritnefndarmaðurinn Guðbergur Bergsson sé stoltur af sínu riti, enda má hann vera það. Stína, segir hann í ritstjórnarpistli, ”er ung og leitandi [...] og reynir að flýja þau örlög að vera eins og önnur íslensk tímarit, einhvern veginn alltaf í andaslitrunum. Stína myndi aldrei sætta sig við það golugeispandi ástand, ekki einu sinni undir dúnsæng bókmenntafélags. Heldur vildi hún detta niður dauð en verða eins og tímaritin sem eru þannig að það tekur því ekki að nefna þau á nafn.”
Þarna er harkalega vegið að Skírni og TMM sýnist mér, því þau eru einu tímaritin sem eru “undir dúnsæng bókmenntafélags” (og vandséð hvers vegna það er syndsamlegra en að vera undir dúnsæng Alþingis eða Háskóla Íslands). Stína er meira að segja undir horni af dúnsæng því JPV er með aðra aðalauglýsingu heftisins. Annars datt mér í hug að fleiri skrifuðu kannski undir dulnefni í Stínu en ábyrgðarmaðurinn Kormákur Bragason (alías Bragi Jósefsson) því ég get ekki betur séð en ritstjórnarpistill Guðbergs sé í raun og veru skrifaður af Tómasi Jónssyni.
Unnendur ljóðlistar á Íslandi hafa fylgst af áhuga með greinum Þorsteins Þorsteinssonar um Sigfús Daðason á undanförnum árum í Andvara, Ritinu, Són, Lesbókinni og Tímariti Máls og menningar. Nú hefur hann safnað þeim saman og bætt miklu efni við og gefið út í stórri og glæsilegri bók sem hann nefnir Ljóðhús eftir forlagi Sigfúsar. Þetta er ein stærsta bók sem skrifuð hefur verið um verk eins íslensks ljóðskálds, og það er ekki bara Sigfús sem er undir því hér eru kannaðar lendur evrópsks skáldskapar á öldinni sem leið þannig að maður er mun fróðari um skáldskap ýmissa erlendra risa eftir lesturinn en áður. Það er enn að segja um þessa bók að Þorsteinn skrifar afar læsilegan texta þannig að erfið viðfangsefni verða skýr í meðförum hans. Hann er þrautreyndur kennari og kann að útskýra og leiða mann áfram svo til fyrirmyndar er. Þegar svo bætist við að Sigfús er eitt merkasta skáld aldarinnar sem leið þá ætti að vera ljóst að þessa bók láta ljóðaunnendur ekki fara framhjá sér.
JPV lætur ekki nægja að gefa út bók um skáldskap heldur bárust þaðan þrjár ljóðabækur nú á fyrstu dögum sumars. Ein er frumraun höfundar síns þótt hann hafi áður gefið út ljóðaþýðingar. Þetta er Valdimar Tómasson bóka- og vísnasafnari og fjölfræðingur um hvort tveggja sem nú stígur fram sem ljóðskáld með bókinni Enn sefur vatnið. Í henni eru smáljóð sem flest fjalla um tilfinningaleg efni, ást og söknuð, og margt er þar vel og fallega sagt. Þetta ljóð heitir “Lind”:
Hjarta mitt
er hemuð lind.
Brestur
við minnstu báru.
Valgarður Egilsson læknir og vísindamaður gaf út bókina Á mörkum með ljóðum sem sum fjalla um náttúru á mörkum hins byggilega heims. Það er ægifagurt landslag í þessum ljóðum og heillandi birta og birtubrigði, en oft ansi kalt. Önnur ljóð bera vísindamanninum vitni, enn önnur sýna að menningararfurinn er skáldinu mikilsverð uppspretta hugmynda og kennda.
Eiginlega er ekki hægt að hugsa sér ólíkari bækur en Á mörgum Valgarðs Egilssonar og Glæpaljóð Kristians Guttesens sem er þriðja ljóðabókin í syrpunni. Þar gengur ungur maður ótrúlega nálægt sjálfum sér í opinskáum, í hæsta máta persónulegum ljóðum um jafnerfitt efni í ljóð og fóstureyðingu. Þetta er mergjuð bók og ekki spillir forsíðumyndin sem er af dúkkunum hans Jóhanns Ludwigs Torfasonar.