Nýtt TMM á leiðinni
Nýtt hefti TMM er á leið í prentsmiðju – stútfullt af efni.
Meðal annars má nefna skarpa grein eftir Guðna Elísson bókmenntafræðing um Staðleysuna Ísland og mýtuna um okkur sjálf; grein eftir Jón Ólafsson prófessor á Bifröst um þann samfélagssáttmála sem hér varð til í góðærinu; brot úr dagbókum Matthíasar Johannessen frá árunum 1999 og 2000 sem eflaust eiga eftir að vekja mikla athygli… Þorsteinn Antonsson hefur legið í eftilátnum fórum Elíasar Marar rithöfundar og orðið margs áskynja: meðal annars fundið merkileg bréf milli Elíasar og Ragnars í Smára þar sem höfundurinn og útgefandi hans skiptast á beisklegum athugasemdum.
Í heftinu eru ljóð eftir Hermann Stefánsson, Hallgrím Helgason og Jeramy Dodds í þýðingu Emils Hjörvars Petersen en Jeramy Dodds kom hingað á bókmenntahátíð fyrir nokkru, eitt Griffin-skáldanna; þarna eru smásögur eftir Kristínu Eiríksdóttur sem kunn er þegar af ljóðum sínum og Jóhann Þórsson sem ekki hefur áður birt eftir sig opinberlega sögur.
Dómar eru margir um bækur liðins árs – meðal annars einn afar langur og vandaður eftir Björn Þór Vilhjálmsson um Vetrarsól Auðar Jónsdóttur og afar harðorður dómur eftir Aðalstein Ingólfsson listfræðing um Icelandic Art Today og bók um Ragnar Kjartansson og framlag hans á Feneyja-bíennalnum.