Útrás
 |
leikþáttur eftir Gunnar Karlsson
Sjá Á líðandi stund … http://www.tmm.is/press.asp?strAction=getPublication&intPublId=1693
ÚTRÁS
 |
Leikþáttur eftir Gunnar Karlsson
Alþjóðlegur fjármálaráðgjafi: … svo þið einkavædduð alla bankana?
Ráðherrann: Já, við einkavæddum alla bankana. Við vissum að ríkið átti ekki að vera að vasast í bankastarfsemi, svo að við einkavæddum þá alla.
Fjármálaráðgjafi: Var engin óánægja með það? Ég meina, hjá almenningi á Íslandi?
Ráðherrann: Neei, eiginlega ekki, það var helst eitthvað með málverkin.
Ráðgjafinn: Málverkin? Hvaða málverk?
Ráðherrann: Ja, Landsbankinn átti einhver málverk og sumum fannst að við ættum að halda þeim eftir. En við létum þau bara fylgja. Ekki gátum við farið að rífa málverkin af veggjunum hjá fólki.
Ráðgjafinn: Og nú eru allir bankarnir gjaldþrota?
Ráðherrann: Líklega, já. Þeir fóru í útrás, og það gekk ekki vel.
Ráðgjafinn: Þið getið gert eitt; þið getið sett lög um að Fjármálaeftirlitið fái heimild til að yfirtaka alla banka í landinu og breyta þeim í ríkisbanka aftur.
-herrann: Ja, það er nú meinið …
-gjafinn: Hvað? Þið hafið Fjármálaeftirlit, er það ekki?
-herrann: Höfðum það að minnsta kosti.
-gjafinn: Höfðuð það? Hvað varð um það?
-herrann: Við einkavæddum það líka.
-gjafinn: Einkavædduð þið Fjármálaeftirlit ríkisins?
-herrann: Já, okkur fannst að ríkið ætti ekki að vera að vasast í fjármálaeftirliti, svo við einkavæddum það. Eins og Bifreiðaeftirlitið áður.
-gjafinn: Og hverjir keyptu það?
-herrann: Ætli það hafi ekki aðallega verið bankarnir?
-gjafinn: Og er það þá gjaldþrota líka?
-herrann: Ég er hræddur um það.
-gjafinn: Það var nú verri sagan. Þá verðið þið bara að láta Seðlabankann yfirtaka viðskiptabankana.
-herrann: Við einkavæddum hann líka.
-gjafinn: Þið einkavædduð hann líka?
-herrann: Já, við héldum að ríkið ætti ekkert að vera að vasast í seðlaprentun.
-gjafinn: Og er hann þá kominn yfrum líka?
-herrann: Ég er hræddur um það.
-gjafinn: Þá held ég að þið verðið bara að snúa ykkur til Alþjóðagjaldeyrissjóðsins og biðja hann um stórt lán til að bjarga ykkur upp úr þessu.
-herrann: Ja, það er nú málið …
-gjafinn: Hvað?
-herrann: Eftir að Seðlabankinn var einkavæddur fór hann í útrás og gekk svo ofsalega vel að hann keypti ráðandi hlut í Alþjóðagjaldeyrissjóðnum.
-gjafinn: Er hann þá kominn á hausinn líka?
-herrann: Hann stendur víst mjög tæpt.
-gjafinn: Þá á ég bara eitt ráð eftir handa ykkur.
-herrann: Og hvað er það?
-gjafinn: Að biðja Guð að hjálpa ykkur.
-herrann: Ja, það er nú eitt …
-gjafinn: Hvað?
-herrann: Við fengum alveg ómótstæðilegt tilboð frá öðrum aðila …
PARIS AT NIGHT
 |
Leikhópurinn Á senunni í Salnum
Leikhópurinn Á SENUNNI snýr aftur og nú með tónleika byggða á hinni frábæru sýningu PARIS AT NIGHT sem hópurinn setti upp árið 2004 í samvinnu við LR í Borgarleikhúsinu. Tónleikarnir verða haldnir í Salnum í Kópavogi þriðjudagskvöldið 4. og miðvikudagskvöldið 5. nóvember næstkomandi og hefjast þeir kl. 20. Miðasala er hafin og miðaverð er 2500 kr.
PARIS AT NIGHT er byggt á ljóðum Jacques Prévert og tónlist Joseph Kosma. Þýðingar ljóðanna eru eftir Sigurð Pálsson. Leikarar/söngvarar í sýningunni eru Jóhanna Vigdís Arnardóttir og Felix Bergsson. Hljómsveitin er undir stjórn Karls Olgeirssonar, en flytjendur auk hans eru Róbert Þórhallsson og Stefán Már Magnússon. Texti um Jacques Prévert verður fluttur af Gerard Lemarquis.
Leikstjóri er Kolbrún Halldórsdóttir.
PARIS AT NIGHT gekk fyrir fullu húsi í Borgarleikhúsinu vorið og haustið 2004 og var sýningin tilnefnd til Grímuverðlaunanna fyrir bestu tónlistina það árið. Plata með tónlistinni og völdum ljóðum kom út haustið 2004. Hana er enn hægt að nálgast hjá hópnum. Dómar gagnrýnenda um sýninguna voru lofsamlegir:
“Perla!” (Stefán Sturla, Rás 2)
“Kolbrúnu Halldórsdóttur hefur tekist að búa til (…) sýningu sem tekst að kalla fram hinn hreina og tæra kjarna sem einkennir ljóð Jacques Préverts…”
“Kannski er það vegna þess að rödd Jóhönnu Vigdísar fellur svo vel að efninu eða ef til vill vegna þess að efnið kallar á slíka rödd – a.m.k. er auðvelt að sannfærast um að einmitt svona eigi að syngja þessi ljóð í hvert sinn sem Jóhanna Vigdís hefur upp raust sína í sýningunni…. Jóhanna Vigdís nær að nálgast þau (ljóðin og lögin) á ferskan hátt svo þau öðlast nýtt líf. Freistingin að mæta aftur á þessa sýningu verður því óyfirstíganleg.”
“Hér er eins og maður hafi fest hendur á einhverju sönnu og tæru eftir að hafa vaðið endalaust um í ótræðismýri falskra tilfinninga og ofhlæðis. Hér finnst loks hinn eini sanni tónn eftir óralanga leit.” (Sveinn Haraldsson, Mbl.)
Miðaverð: 2500 kr.
Miðasala Salarins er opin virka daga kl. 10 – 16 og klst. fyrir tónleika.
_______________________________________
Meira …
Jacques Prévert, eitt mest lesna skáld Frakklands síðan Victor Hugo var og hét, fæddist í París árið 1900. Prévert varð ungur meðlimur í hreyfingu súrrealista sem var leidd af þeim André Breton og Louis Aragon og eru ljóð Prévert undir miklum áhrifum frá þeirri stefnu. Ljóðasafnið Paroles kom út árið 1945 og hefur selst í milljónaupplagi um heim allan og á hundrað ára ártíð Préverts var safnið formlega sett inn á lista yfir sígildar franskar bókmenntir. Ljóðin fjalla á einstaklega mannlegan og áleitin hátt um stríð og frið, ástina og hatrið, París og pólitík. Þau endurspegla á margan hátt ástandið í Evrópu milli tveggja heimsstyrjalda, það annarlega ástand sem skapast þegar fólk lifir af áfergju á þeirri hnífsegg, sem skapast milli stríðs og friðar. En Prévert skrifaði ekki bara ljóð, heldur einnig leikrit og kvikmyndahandrit. Frægasta kvikmyndin sem hann skrifaði er Enfant du Paradis. Jacques Prévert dó í París árið 1977.
Leikhópurinn „Á senunni“ á að baki þrjár leiksýningar í fullri lengd, Hinn fullkomna jafningja, Kvetch og Ævintýrið um Augastein og leikdagskrána Ég býð þér dús mín elskulega þjóð, sem er byggð á verkum Halldórs Laxness og hefur farið víða um land. Hinn fullkomni jafningi, var frumsýndur í Íslensku Óperunni við góðar undirtektir 1999 og hefur nú verið leikinn í London, Tromsö, Malmö og Þórshöfn. Í þessu nýja verki leggjum við áherslu á að nýta okkur það sem við lærðum á Hinum fullkomna jafninga, en þar varð til heilmikil reynsla af því að blanda saman hefðbundinni leiksviðs tækni og myndbandstækninni. Við leggjum mikið uppúr vandaðri mynd- og hljóðrás, svo segja má að verkið verði byggt á þremur hæðum –leikhús/myndband/hljóð.
Bókmenntaverðlaun Tómasar Guðmundssonar
veitt Magnúsi Sigurðssyni
Borgarstjórinn í Reykjavík, Hanna Birna Kristjánsdóttir, veitti í dag í Höfða Bókmenntaverðlaun Tómasar Guðmundssonar árið 2008. Þau hlaut að þessu sinni Magnús Sigurðsson, 24 ára ungskáld, sem er lesendum TMM vel kunnur. Bæði hefur hann birt þar ljóð og greinar, m.a. fallega ástarjátningu til skáldskapar Hannesar Péturssonar í síðasta hefti.
Í ár eru 75 ár liðin síðan ljóðabókin Fagra veröld eftir Tómas Guðmundsson kom út, en stofnað var til Bókmenntaverðlauna Tómasar Guðmundssonar árið 1993 er 60 ár voru liðin frá útkomu hennar. Þegar ,,Fagra veröld” kom út í nóvember 1933 ríkti heimskreppa, en þó seldist fyrsta útgáfa ljóðabókarinnar upp á örfáum dögum. Einkum fögnuðu íbúar Reykjavíkur, en þar var helsta sögusvið ljóðanna. Nú eru verðlaunin veitt árlega í þriðja sinn í stað tvíærings og einungis fyrir óprentað handrit að ljóðabók í stað hvers kyns bókmenntagreina. Alls bárust 28 handrit að þessu sinni. Dómnefndina skipuðu þau Kolbrún Bergþórsdóttir formaður, Þorsteinn Davíðsson og Ingibjörg Haraldsdóttir.
Besta verkið að mati dómnefndar ber heitið Fiðrildi, mynta og spörfuglar Lesbíu og reyndist það vera eftir Magnús Sigurðsson. Magnús Sigurðsson (1984) fæddist á Ísafirði en ólst upp í Reykjavík frá þriggja ára aldri. Á síðasta ári birtist þýðing hans á Söngvunum frá Písa eftir bandaríska ljóðskáldið Ezra Pound. Nú á haustmánuðum kom svo út á vegum Uppheima á Akranesi smásagnasafnið Hálmstráin, safn 18 smásagna. Magnús stundar meistaranám í íslenskum bókmenntum við Háskóla Íslands.
Í umsögn dómnefndar segir m.a.:
,,Fiðrildi, mynta og spörfuglar Lesbíu er óvenjuleg ljóðabók sem stefnir saman erlendum tungumálum, þýðingum og frumortum skáldskap á eftirminnilegan hátt. Ástarkveðskapur rómversku stórskáldanna Katúllusar og Virgils vaknar hér til lífsins í nýjum og nútímalegum þýðingum sem kallast á við frumort ljóð höfundar bókarinnar með margvíslegum hætti. Úr verður heilsteypt verk þar sem ástin, en þó ekki síst sambandsslit elskenda, leikur stórt hlutverk.
Titill bókarinnar er hending úr einum ljóðsöngva Ezra Pounds, þess skálds 20. aldar sem öðrum framar tvinnaði saman þýðingar og frumort ljóð. Magnús tekur upp þann þráð en spinnur áfram með eigin hætti. Ljóð hans eru skýr, beinskeytt og sett fram á ljósu máli. Hér stígur fram áhugaverður og nýr höfundur”.
Verðlaunaféð nemur 600 þúsund krónum. Útgáfuréttur verðlaunahandrits er í höndum höfundar eða þess forlags sem hann ákveður. Verðlaunabókin Fiðrildi, mynta og spörfuglar Lesbíu eftir Magnús Sigurðsson kom út á vegum bókaforlagsins Uppheima um leið og verðlaunaafhendingin fór fram.
HUGLEIKUR HREIÐRAR UM SIG Í HAFNARHÚSINU
 |
í tilefni af stórafmæli
Leikfélagið Hugleikur sýnir stuttverkadagskrána
Ó, þessi tæri einfaldleiki í Listasafni Reykjavíkur, Hafnarhúsi. Dagskráin samanstendur af níu nýjum stuttverkum sem eiga það sammerkt að hafa afmæli sem þema. Sýningin markar þannig upphafið á afmælisári Hugleiks sem fagnar 25 ára starfsafmæli sínu leikárið 2008-2009. Leikstjórn stuttverkanna er í höndum félagsmanna, en tónlistarflutningi stjórnar Gunnar Ben. Sýningarnar verða aðeins þrjár og hefjast allar kl. 20:00. Frumsýning er föstudag 31. október en hinar sýningarnar fylgja í kjölfarið á laugardag 1. nóvember og sunnudag 2. nóvember. Miðasala er í gegnum netfangið hugleikur@hugleikur.is
Ljóðstafur Jóns úr Vör
Skilafrestur til 1. desember 2008
Lista- og menningarráð Kópavogs efnir til árlegrar ljóðasamkeppni undir heitinu Ljóðstafur Jóns úr Vör.
Veitt verða vegleg verðlaun og mun verðlaunaskáldið fá til varðveislu í eitt ár göngustaf sem á verður festur skjöldur með nafni þess.
Þriggja manna dómnefnd mun velja úr ljóðum sem berast.
Öllum skáldum er velkomið að senda ljóð í keppnina. Þau mega ekki hafa birst áður. Ljóðum skal skilað með dulnefni og skal nafn, heimili og sími skáldsins fylgja með í lokuðu umslagi auðkennt með sama dulnefni. Aðeins má senda eitt ljóð í hverju umslagi og þess vænst að ljóðunum sé skilað á pappírsstærðinni A-4 eða A-5.
Skilafrestur er til 1. desember 2008 og utanáskriftin er:
Ljóðstafur Jóns úr Vör
Tómstunda- og menningarsvið Kópavogs
Fannborg 2, 200 Kópavogur
Afhending verðlaunanna fer fram á afmælisdegi Jóns úr Vör föstudagskvöldið 21. janúar 2009.
Þátttöku ljóð má sækja á ofangreint heimilisfang fyrir 1. febrúar; eftir það verður þeim eytt.
Að finna lyktina af öðrum tíma
 |
Erpur Eyvindarson fjallar um Atómstöðina
Í vetur er ungt fólk í aðalhlutverki í stofunni á Gljúfrasteini og rýnir í verk Halldórs Laxness. Sunnudaginn 26. október kl. 16.00 mun Erpur Eyvindarson, Rottweiler hundur og rappari, fjalla um pólitísku skáldsöguna Atómstöðina eftir Halldór Laxness. Erpur mun leggja áherslu á sagnfræðilegt samhengi út frá tísku, hugsun, pólitík og listum.
Hann telur að til þess að nútíma lesandi geti sett sig í aðrar aðstæður en þær sem hann býr við í dag er ekki nóg að fjalla um aðstæðurnar í tölum og hversdagslegum vitnisburði almennings, eða eins og Erpur orðar það: „maður þarf að finna lyktina af öðrum tíma og geta tuggið á því. Þess vegna eru rithöfundar oft bestu sagnfræðingarnir því þeir búa yfir galdri sem er nauðsynlegur til að ferja þig aftur í tímann.“
Það má búast við spennandi stofuspjalli frá Erpi á sunnudaginn. Að venju er aðgangur ókeypis og allir velkomnir.
Verk mánaðarins er fastur liður í starfsemi Gljúfrasteins og má sjá dagskrá haustsins í heild sinni á heimasíðu Gljúfrasteins.
Gæinn sem geymir aurinn minn
Gæinn sem geymir aurinn minn
Ég finn það gegnum netið
að ég kemst ekki inn
á bankareikninginn,
en ég veit að það er gæi
sem geymir aurinn minn,
sem gætir alls míns fjár,
og er svo fjandi klár,
kann fjármál upp á hár,
býður hæstu vextina,
og jólagjöf hvert ár.
Ég veit hann axlar ábyrgð,
en vælir ekki neitt,
fær þess vegna vel greitt,
hendur hans svo hvítþvegnar
og hárið aftursleikt.
Þó segi’ í blöðunum
frá bankagjaldþrotum
hann fullvissar mig um:
Það er engin áhætta
í markaðssjóðunum.
Ég veit að þessi gæi
er vel að sér og vís;
í skattaparadís
á hann eflaust fúlgur fjár,
ef hann kemst á hálan ís.
Því oftast er það sá,
sem minnstan pening á,
sem skuldin endar hjá. –
Fáir slökkva eldana,
sem fyrstir kveikja þá.
Fin.
Október 2008.
Dagur raddarinnar í Gerðubergi
 |
| Diddú er meðal þátttakenda á Degi raddarinnar. |
… og allir vilja vera á sviðinu
Sunnudaginn 26. október kl. 13.50-17.30
Litaspjald raddarinnar verður skoðað á Degi raddarinnar í heimi óperunnar, ljóðasöngva, þjóðlegra stefja og íslenska einsöngslagsins. Meðal stórsöngvara sem koma fram eru Diddú, Jóhann Friðgeir Valdimarsson, Bergþór Pálsson og Signý Sæmundsdóttir. Sjá dagskrá á www.gerduberg.is
Dagur hljóðfærisins hefur verið haldinn í Gerðubergi sl. 10 ár og má þar nefna Dag gítarsins, flautunnar og Dag hinna djúpu strengja og er Dagur raddarinnar síðasta dagskráin í þessari seríu. Kynnir er Margrét Bóasdóttir.
Dagurinn er samstarfsverkefni Félags íslenskra tónlistarmanna og Félags íslenskra söngkennara með styrk frá Reykjavíkurborg og Tónastöðinni.
Aðgangseyrir 1.500 kr – frítt fyrir tónlistarnema og 12 ára og yngri.
AÐSÓKN EYKST UM SJÖTÍU PRÓSENT
 |
YFIR TVÖ HUNDRUÐ ÞÚSUND GESTIR Á ÁRINU
Frá því að veittur var gjaldfrjáls aðgangur að Listasafni Reykjavíkur um síðustu áramót hefur aðsókn að safninu aukist um tæp sjötíu prósent. Listasafn Reykjavíkur hefur yfir að ráða þremur safnhúsum; Hafnarhúsi, Kjarvalsstöðum og Ásmundarsafni og er aukning gesta sambærileg í öllum húsunum.
SAMEIGINLEG LÍFSGÆÐI
Með því að veita gjaldfrjálsan aðgang vill Listasafn Reykjavíkur undirstrika að safnið er hluti af sameiginlegum lífsgæðum borgarbúa og aðgengilegt öllum. Starfsfólk safnsins er stolt og þakklátt fyrir þann árangur sem náðst hefur en nú stefnir í að gestafjöldi á árinu 2008 fari yfir tvö hundruð þúsund. Á þeim óvissutímum sem nú blasa við er mikilvægt að leita sér örvunar og upplyftingar í menningu og listum og vonast safnið til að geta lagt þar sitt af mörkum. Mörg söfn á höfuðborgarsvæðinu bjóða nú upp á gjaldfrjálsan aðgang en í Listasafni Reykjavíkur hefur samhliða því verið aukið sérstaklega framboð af viðburðum sem henta leikum sem lærðum, ungum sem öldnum.
OFURGESTUR OG FJÖLSKYLDUVIÐBURÐIR
Listasafn Reykjavíkur leggur metnað sinn í að hafa sýningar aðgengilegar fyrir breiðan hóp fólks og að miðla þeim til gesta á fjölbreyttan máta. Safnið leggur áherslu á bjóða fjölskyldufólk velkomið og hefur m.a. helgað þessum hópi sérstaklega einn af sýningarsölum Kjarvalsstaða. Þá eru reglulega leiðsagnir og leiðangrar um sýningar safnsins sem eru miðaðar við þátttöku fjölskyldufólks. Við komuna í Listasafn Reykjavíkur stendur öllum ungum safngestum til boða létt og skemmtilegt verkefni sem gaman er að glíma við með fjölskyldunni þegar farið er um sýningarnar. Verkefnið nefnist Ofurgesturinn og því fylgir verkefnabók, gríma og blýantur.
Hús Listasafns Reykjavíkur eru opin alla daga vikunnar og Hafnarhúsið er opið til klukkan tíu öll fimmtudagskvöld.
Von Listasafns Reykjavíkur er að ókeypis aðgangur auðgi enn frekar þá skapandi borg sem Reykjavík er og minni á að sterkt menningarumhverfi er grundvöllur góðs samfélags.
AÐGANGUR ÓKEYPIS
LISTASAFN REYKJAVÍKUR ER SAFNIÐ ÞITT