Kynning á Tíbrárröðinni í Salnum
 |
Ný TÍBRÁ-tónleikaröð Kópavogs í Salnum starfsárið 2006 – 2007 er nú tilbúin og margir framúrskarandi tónlistarmenn eru væntanlegir í Salinn. Tónleikar í TÍBRÁ á komandi starfsári eru 34 talsins og nú sem fyrr geta tónleikagestir sett saman sína eigin TÍBRÁR röð að vild og eftir hentugleika. Bestu kjör á TÍBRÁR tónleika eru fengin með því að kaupa miða á 5 tónleika samtímis og fylgir þá 1 miði í kaupbæti; 6 tónleikar á verði 5.
Almennt miðaverð er 2.000 kr., verð fyrir 67 ára og eldri, öryrkja og námsmenn er 1.600 kr., og 12 ára og yngri greiða 800 kr. Afsláttur er fyrir hópa, 15 gesti eða fleiri. Fastagestir Salarins, þ.e. þeir viðskiptavinir sem hafa áður fest kaup á tónleikaröð, hafa forkaupsrétt til miðakaupa á TÍBRÁR-tónleika frá og með þriðjudegi 22. ágúst, en almenn miðasala á alla TÍBRÁR tónleika starfsársins hefst mánudaginn 28. ágúst kl. 10.
KYNNING DAGSKRÁR OG STYRKVEITING Í SALNUM
Laugardaginn 2. september kemur út ný tónleikaskrá Salarins fyrir starfsárið 2006-2007 og af því tilefni er efnt til dagskrár í Salnum sem hefst kl. 13.30 og eru allir velkomnir. Þar kynnir Jónas Ingimundarson TÍBRÁR-tónleika starfsársins, sagt verður frá Tónleikaröð kennara Tónlistarskóla Kópavogs (TKTK) og Gunnar I. Birgisson bæjarstjóri greinir frá Kanadískri menningarhátíð sem haldin verður í Kópavogi dagana 14. – 22. október. Að því búnu fer fram árleg styrkveiting úr Styrktarsjóði Önnu Karólínu Nordal að upphæð 500.000 krónur, en sjóðnum er ætlað að styrkja efnilega tónlistarnema í „söng og fíólínspili”. Þetta er í fimmta sinn sem styrkurinn er afhentur í Salnum, en áður hlutu þar styrkinn þau Guðrún Jóhanna Ólafsdóttir mezzósópran árið 2002, Eyjólfur Eyjólfsson tenórsöngvari árið 2003, Ari Þór Vilhjálmsson fiðluleikari árið 2004 og Jónas Guðmundsson tenórsöngvari árið 2005. Í lok dagskár flytur nýbakaður styrkþegi nokkur lög og að því búnu verður boðið upp á veitingar í forrými Salarins. Þar gefst viðstöddum tækifæri til að kynna sér nánar ýmsa glæsilega listviðburði sem framundan eru í Salnum og festa sér miða á eftirsótta tónleika. Dagskráin í Salnum hefst sem fyrr segir kl. 13.30 og eru allir velkomnir.
Fyrstu tónleikarnir í TÍBRÁ eru að venju 7. september og það er með nokkru stolti sem við greinum frá því að það er hinn heimskunni búlgarski píanóvirtúós, Vesselin Stanev, sem opnar TÍBRÁ að þessu sinni, en tónleikarnir eru haldnir í samstarfi við Morgunblaðið og svissneska vélaframleiðandann, Ferag. Aðeins er um þessa einu tónleika að ræða og því um að gera að festa sér miða sem fyrst.
Í byrjun september verður tónleikaskrá Salarins með ítarlegum upplýsingum um tónleikahald starfsársins á vegum Kópavogsbæjar borin í hvert hús á höfuðborgarsvæðinu.
Nánari upplýsingar um einstaka tónleika og flytjendur í TÍBRÁ ársins 2006-2007 er að finna á Salarvefnum www.salurinn.is
TÍBRÁ TÓNLEIKARÖÐ KÓPAVOGS Í SALNUM SEPTEMBER 2006 – MAÍ 2007
___________________________________________________________________________
SEPTEMBER 2006
FIMMTUDAGUR 7. SEPTEMBER KL. 20
TÍBRÁ: PÍANÓTÓNLEIKAR
Vesselin Stanev - Scarlatti / Schumann / Scriabin / Liszt
FIMMTUDAGUR 14. SEPTEMBER KL. 20
TÍBRÁ: DJASSHLJÓMSVEIT EYJÓLFS ÞORLEIFSSONAR
Tónlist Eyjólfur Þorleifsson / Textar Bragi Valdimar Skúlason
MIÐVIKUDAGUR 20. SEPTEMBER KL. 20
TÍBRÁ: PÍANÓTÓNLEIKAR
Peter Máté - Liszt / Chopin / Janácek / Hjálmar H / Schubert
ÞRIÐJUDAGUR 26. SEPTEMBER KL. 20
TÍBRÁ: SEMBALTÓNLEIKARSmiljka Isaković - Tónlist frá Iberiu- og Balkan-skaga
OKTÓBER 2006
SUNNUDAGUR 8. OKTÓBER KL. 20
TÍBRÁ: LJÓÐATÓNLEIKAR
Guðrún Jóhanna Ólafsdóttir, Víkingur Heiðar Ólafsson – Grieg / Schumann
MIÐVIKUDAGUR 25. OKTÓBER KL. 20
TÍBRÁ: SELLÓ, FLAUTA, PÍANÓ
Sigurður Halldórsson, Pamela De Sensi, Daníel Þorsteinsson – Suður-Amerísk verk
LAUGARDAGUR 28. OKTÓBER KL. 20
TÍBRÁ: ÓPERUTÓNLEIKAR
Auður Gunnarsdóttir, Alina Dubik, Gunnar Guðbjörnsson, Bjarni Thor Kristinsson, Jónas Ingimundarson – Aríur, dúettar, tríó og kvartettar úr óperum
NÓVEMBER 2006
FÖSTUDAGUR 3. NÓVEMBER KL. 20
TÍBRÁ: FIÐLA OG PÍANÓ
Réka Szilvay, Heini Kärkkäinen – Bartók / Beethoven / Messiaen / Grieg
SUNNUDAGUR 5. NÓVEMBER KL. 20
TÍBRÁ: TÍU SELLÓ Í SALNUM
Sellósveit Sinfóníuhljómsveitar Íslands – fjölbreytt efnisskrá
MIÐVIKUDAGUR 15. NÓVEMBER KL. 20
TÍBRÁ: SJOSTAKOVITZ FYRIR PÍANÓ
Elizaveta Kopelman – Prelúdíur og fúgur Sjostakovitz – fyrri hluti
FÖSTUDAGUR 17. NÓVEMBER KL. 20
TÍBRÁ: SJOSTAKOVITZ FYRIR PÍANÓ
Elizaveta Kopelman – Prelúdíur og fúgur Sjostakovitz – síðari hluti
MÁNUDAGUR 20. NÓVEMBER KL. 20
TÍBRÁ: MOZART MEÐ MIKLÓS Á MÁNUDÖGUM
Miklós Dalmay – Píanósónötur Mozarts nr. 1 til 5 – fyrsti hluti af fjórum
MÁNUDAGUR 27. NÓVEMBER KL. 20
TÍBRÁ: MOZART MEÐ MIKLÓS Á MÁNUDÖGUM
Miklós Dalmay – Píanósónötur Mozarts nr. 6 til 9 – annar hluti af fjórum
DESEMBER 2006
FÖSTUDAGUR 1. DESEMBER KL. 20
TÍBRÁ: TÓNLIST ÁRNA BJÖRNSSONAR
Sigrún Eðvaldsdóttir, Gunnar Guðbjörnsson, Jónas Ingimundarson,
Kammerkór Hafnafjarðar, stjórnandi Helgi Bragason
MÁNUDAGUR 4. DESEMBER KL. 20
TÍBRÁ: MOZART MEÐ MIKLÓS Á MÁNUDÖGUM
Miklós Dalmay – Píanósónötur Mozarts nr. 10 til 13 – þriðji hluti af fjórum
FÖSTUDAGUR 8. DESEMBER KL. 20
TÍBRÁ: STÓRTÓNLEIKAR
Inessa Galante og Jónas Ingimundarson – Glæsilegar sópranaríur, antique-aríur o.fl.
SUNNUDAGUR 10. DESEMBER KL. 16
TÍBRÁ: JÓLATÓNLEIKAR SALARINS
Umsjón Ólafur Kjartan Sigurðarson- Jólatónlist úr ýmsum áttum fyrir alla fjölskylduna
MÁNUDAGUR 11. DESEMBER KL. 20
TÍBRÁ: MOZART MEÐ MIKLÓS Á MÁNUDÖGUM
Miklós Dalmay – Píanósónötur Mozarts nr. 14 til 18 – fjórði hluti af fjórum
JANÚAR 2007
ÞRIÐJUDAGUR 9. JANÚAR KL. 20
TÍBRÁ: EINLEIKUR Á SELLÓ
Sæunn Þorsteinsdóttir – debut – J.S.Bach / Penderecki / Kodaly
LAUGARDAGUR 13. JANÚAR KL. 16
TÍBRÁ: NÝÁRSTÓNLEIKAR SALARINS
Hanna Dóra Sturludóttir, Lothar Odinius og Salonhljómsveit Sigurðar Ingva – Vínartónlist
FÖSTUDAGUR 19. JANÚAR KL. 20
TÍBRÁ: FLAUTA OG PÍANÓ
Stefán Höskuldsson, Elisaveta Kopelman – Gaubert / Messiaen / Schubert / Mower
LAUGARDAGUR 27. JANÚAR KL. 16
TÍBRÁ: SÖNGTÓNLEIKAR
Bjarni Thor Kristinsson, Jónas Ingimundarson - fjölbreytt efnisskrá
FEBRÚAR 2007
MIÐVIKUDAGUR 7. FEBRÚAR KL. 20
TÍBRÁ: SELLÓ OG PÍANÓ
Margrét Árnadóttir, Anna G Guðmundsdóttir - J.S.Bach / Poulenc / Mendelssohn / Brahms
FIMMTUDAGUR 15. FEBRÚAR KL. 20
TÍBRÁ: TEREM KVARTETTINN
Кonstantinov, Barshchev, Smirnov, Dzyudze – fjölbreytt efnisskrá
FÖSTUDAGUR 16. FEBRÚAR KL. 20
TÍBRÁ: SÖNGTÓNLEIKAR
Sesselja Kristjánsdóttir, Guðríður St. Sigurðardóttir - sönglög og kabarettsöngvar
MIÐVIKUDAGUR 28. FEBRÚAR KL. 20
TÍBRÁ: FIÐLA OG PÍANÓ
Elva Rún Kristinsdóttir, Kristinn Örn Kristinsson – HHallgrímsson / Schumann / Bach / Ravel
MARS 2007
ÞRIÐJUDAGUR 6. MARS KL. 20
TÍBRÁ: SÖNGTÓNLEIKAR
Viðar Gunnarsson, Jónas Ingimundarson – Íslensk sönglög og aríur
ÞRIÐJUDAGUR 20. MARS KL. 20
TÍBRÁ: PÍANÓTÓNLEIKAR
Valgerður Andrésdóttir – Vasks / Takemitsu / Mixa / Mozart / Liszt
LAUGARDAGUR 24. MARS KL. 16
TÍBRÁ: SÖNGTÓNLEIKAR
Hlín Pétursdóttir, Hrefna Eggertsdóttir – Íslensk sönglög og ljóðasöngur
APRÍL 2007
SUNNUDAGUR 1. APRÍL KL. 20
TÍBRÁ: HYPERION TRÍÓIÐ
Oliver Klipp, Katarina Troe, Hagen Schwarzrock – Mozart / Atli Heimir / Beethoven
MIÐVIKUDAGUR 11. APRÍL KL. 20
TÍBRÁ: FLAUTA OG PÍANÓ
Hallfríður Ólafsdóttir, John Robilette – Poulenc / Chopin / Fauré / Dohnányi / Franck
MAÍ 2007
LAUGARDAGUR 5. MAÍ KL. 16
TÍBRÁ: SÖNGTÓNLEIKAR
Emiliana Torrini og Skólakór Kársness
SUNNUDAGUR 6. MAÍ KL. 20
TÍBRÁ: DJASSTÓNLEIKAR – SIGFÚS Í LJÚFRI SVEIFLU
Jón Páll Bjarnason, Reynir Sigurðsson, Gunnar Hrafnsson – Tónlist eftir Sigfús Halldórsson
FIMMTUDAGUR 11. MAÍ KL. 20
TÍBRÁ: PÍANÓTÓNLEIKAR
Víkingur Heiðar Ólafsson - J.S.Bach/ Beethoven / Ólafur Óskar Axelsson / Brahms / Chopin
Skáldskapur frá Hjaltlandi
 |
| Lise Sinclair frá Friðarey, ein af góðum gestum frá Hjaltlandi. |
á dagskrá í Norræna húsinu á sunnudaginn
Fjórir rithöfundar frá Hjaltlandseyjum koma fram og lesa úr verkum sínum í Norræna húsinu sunnudaginn 3. september kl. 16. Einnig verður flutt tónlist og þýðingar á hjaltlenskum skáldskap.
Heimsókn höfundanna er að frumkvæði Menningarstofnunar Hjaltlands og er liður í að kynna bókmenntir eyjanna fyrir umheiminum. Höfundarnir fjórir eru: Lise Sinclair, ljóðskáld og tónlistarmaður frá Friðarey, sem er miðja vegu milli Orkneyja og Hjaltlands, Donald S. Murrey, ljóðskáld, frá Suðureyjum en búsettur á Hjaltlandi, Matthew Wright, smásagnahöfundur, frá Orkneyjum en búsettur á Hjaltlandi og Jen Hadfield, ljóðskáld frá Englandi og staðarskáld á Hjaltlandi. Þeir Aðalsteinn Ásberg Sigurðsson og Gyrðir Elíasson koma einnig fram ásamt höfundunum fjórum og lesa úr þýðingum sínum á verkum þeirra.
Hjaltlandseyjar, sem eru fyrir norðan Skotland, voru í eina tíð byggðar norrænum mönnum og þar var allt fram á 19. öld töluð norræna. Enn þann dag í dag koma örnefni á eyjunum Íslendingum kunnuglega fyrir sjónir og þótt enska hafi lengi verið ráðandi tungumál á þessum slóðum er á Hjaltlandi töluð mállýska sem allmargir rithöfundar hafa tileinkað sér sem ritmál í seinni tíð.
Dagskráin í Norræna húsinu er ókeypis og öllum opin
Atvinnuleikhúsin í vetur
 |
Hvar á maður að kaupa sér áskriftarkort?
Sjá http://www.tmm.is/default2.asp?strAction=getPublication&intPublId=487
Atvinnuleikhúsin í vetur
 |
| Hér má sjá hluta af fjölskyldunni á númer 2 í Sitji guðs englar sem verður sýnt í Þjóðleikhúsinu í haust. |
Hvar á maður að fá sér áskriftarkort?
Jæja, þá er dagskrá atvinnuleikhúsa landsins komin á hreint, en ekki er eins ljóst hvar maður ætti að fá sér áskriftarkort. Valið er svo erfitt að sjálfsagt munu margir kjósa að kaupa sig inn á öll húsin. Þá er rétt að benda á að bæði Leikfélag Reykjavíkur og Akureyrar eru með sérstaklega fín tilboð. Afmælistilboð LR er upp á 3000 kr. fyrir miða á þrjár sýningar, Mein Kampf, Dag vonar og eina að eigin vali. Það tilboð gildir bara núna um helgina, 2. og 3. september! LA býður ungu fólki, 25 ára og yngra, áskriftarkort á fjórar leiksýningar á aðeins 3.950. Það er tilraun til að yngja gestahópinn og hefur tekist svo vel að aðrir ættu að fara að því ráði. Kort á fimm sýningar í Þjóðleikhúsinu kosta kr.12.000 og þeir sem kaupa kort fyrir septemberlok fá að gjöf miða á Eldhús eftir máli eða Fagnað.
Þjóðleikhúsið fyrst. Þar er fjölbreytni í fyrirrúmi því verkin tíu sem þar verða frumsýnd á leikárinu eru hreint af öllu tagi: Nýr gamanleikur sem fer eins og eldur í sinu um heiminn, eitt af meistaraverkum grísku gullaldarinnar, leikgerð af geysivinsælli íslenskri barnabók, „vísindasöngleikur“ eftir einn af áhugaverðustu höfundum ungu kynslóðarinnar og áhrifamikil erlend verk í nánum tengslum við samtímann. Einnig er boðið upp á vinsælar sýningar frá fyrra leikári, ásamt frumlegum barnasýningum og öflugu fræðslustarfi.
Fyrsta frumsýning haustsins á Stóra sviðinu er Sitji guðs englar, leikgerð Illuga Jökulssonar eftir gullvægum barnabókum Guðrúnar Helgadóttur Sitji Guðs englar, Saman í hring og Sænginni yfir minni. Leikstjóri er Sigurður Sigurjónsson en Þórarinn Eldjárn gerði söngtexta. Brynhildur Guðjónsdóttir leikur Heiðu.
Ólafía Hrönn Jónsdóttir var sannkölluð stjarna síðasta leikárs, svo minnisstæð er hún í jafnólíkum hlutverkum og móður Péturs Gauts, mágkonunni í Átta konum og ræningjafrúnni í Túskildingsóperunni. Nú fær hún að leggja undir sig Stóra sviðið í lok október þegar frumsýnt verður verkið Stórfengleg, byggt á ævi Florence Foster Jenkins sem hefur verið kölluð „versta söngkona allra tíma“. Þetta er geggjaður gamanleikur og meðal þátttakenda ásamt Ólafíu Hrönn má nefna Örn Árnason. Ágústa Skúladóttir leikstýrir en frumsýning verður í lok október.
Svall og taumleysi munu svo ríkja á sviðinu um jólin þegar einn þekktasti harmleikur grísku gullaldarinnar, Bakkynjur eftir Evrípídes verður frumsýndur í fyrsta sinn á íslensku leiksviði. Verkið birtir hin sígildu mannlegu átök milli samfélagslegs aga og hamslausrar lífsnautnar og segir frá því þegar guðinn Díonísos stígur niður til jarðar og veldur mikilli óreiðu meðal fólksins – einkum kvenna. Giorgos Zamboulakis er leikstjóri og beitir sérstökum vinnuaðferðum sem byggjast á forngrískri leikhúshefð í samvinnu við Thanos Vovolis sem sér um leikmynd, búninga, grímur og gervi. Atli Ingólfsson semur tónlist og Erna Ómarsdóttir sér um dansa og sviðshreyfingar. Frést hefur að hinn nýútskrifaði Stefán Hallur Stefánsson muni leika guðinn …
Nútíminn tekur svo við af fornöldinni í febrúar þegar Leg, vísindasöngleikur eftir Hugleik Dagsson verður frumsýndur. Hugleikur hefur vakið mikla athygli innan lands og utan með örmyndasögum sínum, sem fjalla um meinsemdir nútímasamfélags á miskunnarlausan og meinfyndinn hátt. Leikstjóri er Stefán Jónsson en Ilmur Stefánsdóttir gerir leikmynd. Tónlist er eftir Davíð Þór Jónsson.
Síðasta frumsýning leikársins á Stóra sviðinu verður Hjónabandsglæpir eftir Eric-Emmanuel Schmitt,
glænýtt verk eftir höfund hinna geysivinsælu leikrita Abel Snorko býr einn og Gesturinn. Edda Heiðrún Backman
leikstýrir þeim Elvu Ósk Ólafsdóttur og Hilmi Snæ Guðnasyni í þessu nærgöngula átakaverki.
Kassinn stimplaði sig eftirminnilega inn í íslenskt leikhúslíf á síðasta ári með verðlaunasýningunni Pétri Gaut eftir Henrik Ibsen, í leikgerð og undir stjórn Baltasars Kormáks. Pétur Gautur, sem hlaut 6 Grímur í vor, meðal annars sem besta sýning ársins, mun ráða áfram ríkjum í Kassanum fram eftir hausti.
Í janúar er fyrsta frumsýning ársins í Kassanum á Pleasure Islands – Ókannaða landið eftir Jacob Hirdwall undir leikstjórn Maríu Ellingsen. Þetta er áleitið spennuverk sem tekst á við stórar spurningar. Hálsfesti Helenu eftir Carole Fréchette, sem er eitt þekktasta nútímaleikskáld Kanada, verður frumsýnt í Kassanum í apríl. Áhrifamikið og óvenjulegt verk um mannlega samkennd og löngunina til að endurheimta hið glataða.
Fyrsta frumsýning ársins á Smíðaverkstæðinu er á Sumardegi eftir Jon Fosse sem Egill Heiðar Anton Pálsson stýrir. Leikrit Fosses hafa vakið mikla athygli víða um Evrópu á undanförnum árum, en Sumardagur er fyrsta leikrit hans sem sýnt er í íslensku atvinnuleikhúsi. Meðal leikara eru Kristbjörg Kjeld, Margrét
Vilhjálmsdóttir og Hjálmar Hjálmarsson.
Í október verður frumsýnt verkið Patrekur 1,5 eftir Michael Druker í leikstjórn Gunnars Helgasonar. Bráðfyndið
leikrit, þar sem tekist er á við fordóma af ýmsu tagi á frumlegan og skemmtilegan hátt. Verkið verður sýnt í
Þjóðleikhúsinu, framhaldsskólum og víðar.
Amma djöfull heitir verk eftir Ásdísi Thoroddsen sem frumsýnt verður á Smíðaverkstæðinu í janúar. Nýtt íslenskt verk, þar sem skrattinn gæti hitt ömmu sína, Ágústa Skúladóttir stýrir.
Það er stórfrétt að Þjóðleikhúsið ætlar að opna brúðuleikhús á Litla sviðinu. Á síðasta leikári leysti Kassinn, hið nýja svið Þjóðleikhússins við Lindargötu, Litla sviðið af hólmi sem leiksvið, en í vetur mun Litla sviðið öðlast nýtt hlutverk sem brúðuleikhús. Vígslusýningin verður sýning brúðusnillingsins Bernds Ogrodniks, Umbreyting – Ljóð á hreyfingu, sem var frumsýnd á Listahátíð í Reykjavík í vor og hlaut einróma lof gagnrýnenda. Sýningar hefjast 6. október en síðar í vetur er svo von á annarri sýningu úr smiðju Bernds Ogrodniks. Auk þessa verða Fagnaður eftir Harold Pinter undir stjórn Stefáns Jónssonar og Eldhús eftir máli – Hversdagslegar hryllingssögur eftir Völu Þórsdóttur sem Ágústa Skúladóttir leikstýrir teknar upp aftur
Leitin að jólunum eftir Þorvald Þorsteinsson og Árna Egilsson, árleg jólasýning Þjóðleikhússins fyrir börn, verður sýnd undir lok nóvember og í desember. Leikstjóri er Þórhallur Sigurðsson. Hún var frumsýnd á síðasta leikári og hlaut Grímuna sem barnasýning ársins.
Gestasýningar frá Japan, Póllandi, Svíþjóð, Frakklandi og Bretlandi munu rata á fjalir leikhússins í vetur, auk íslenskra gestasýninga. Fyrst á svið er japönsk gestasýning sem heitir Double Nora. Þar er tekist á við Brúðuheimili Ibsens með nýstárlegum hætti í hefðbundnum japönskum Noh leikstíl. Sýningin hefur verið sýnd á Norðurlöndum og hlotið afbragðs góða dóma. Sýningar verða 2. og 3. september. Í byrjun október er svo von á annarri gestasýningu frá Japan á leikriti Shakespeares, Snegla tamin.
Þá er það Borgarleikhúsið. Þar má fyrst frægan telja Wolfgang Amadeus Mozart og leikritið um hann og örlagarík samskipti hans við Antonio Salieri, hirðskáld austurríska keisarans, eftir Peter Shaffer. Margir minnast sýningar Þjóðleikhússins á þessu verki með Sigurð Sigurjónsson í aðalhlutverkinu. Verkið byggir á sögusögnum um dularfullan dauða Mozarts og þátt Salieri í honum. Í verkinu vinnur Salieri traust unga tónskáldsins og þykist ganga erinda hans en er í raun að grafa undan honum. Salieri kvelst af afbrýði sem dregur hann til andstyggilegra tilrauna til að koma Amadeusi á kné og draga hann loks til dauða. Leikstjóri er Stefán Baldursson og í aðalhlutverkum eru Víðir Guðmundsson, nýútskrifaður leikari, og Hilmir Snær Guðnason. Verður gaman að sjá þann ljúfa dreng Hilmi takast á við illmenni.
Annað klassískt verk og meira að segja íslenskt er Dagur vonar eftir Birgi Sigurðsson sem sett verður upp í tilefni af 110 ára afmæli Leikfélags Reykjavíkur í janúar næstkomandi. Þetta er magnað fjölskyldudrama um ekkjuna Láru sem býr með þremur stálpuðum börnum sínum, Öldu sem er geðveik, Reyni hinum jarðbundna og Herði sem gælir við listamannsdrauma. Inn á heimilið kemur elskhugi Láru, Gunnar, atvinnulaus alkóhólisti sem kyndir undir átökum í fjölskyldunni með hrikalegum afleiðingum. Mörgum er þetta verk minnisstætt úr uppsetningu Stefáns Baldurssonar fyrir 20 árum og sjónvarpsgerð Lárusar Ýmis Óskarssonar nokkru seinna. Nú leikstýrir Hilmir Snær Guðnason verkinu og vitað er að Rúnar Freyr Gíslason leikur annan bróðurinn.
Á Nýja sviði kemur fyrst Mein Kampf eftir George Tabori, gamanleikur um ungan myndlistarnema, Adolf Hitler, sem kemur til Vínar að sækja um skólavist. Honum er hafnað. Tveir Gyðingar á pensjónati taka hann að sér – annar hvetur hann til að leggja fyrir sig pólitík. Frú Dauði vitjar hans – ekki til að nema hann á brott, heldur til að ráða hann í vinnu. Bergur Þór Ingólfsson leikur Adolf Hitler og Hafliði Arngrímsson stýrir.
Þeir fjölmörgu sem sáu sýninguna Penetreitor í Sjóminjasafninu munu gleðjast yfir því að LR ætlar að sýna í vetur tvö leikrit eftir sama höfund, Skotann Anthony Neilson. Annað heitir Fagra veröld (Wonderful World of Dissocia) og segir ævintýrið um Lísu. Þar fylgjumst við með því hvernig hún dregst inn í heim geðveikinnar, og eins og nafna hennar hjá Lewis Carroll mætir hún þar allskyns dularfullum verum og furðulegum aðstæðum sem hún verður að takast á við. Benedikt Erlingsson leikstýrir þessu stykki, en hinu leikritinu eftir Neilson stýrir Steinunn Knútsdóttir. Það heitir Lík í óskilum og fjallar um óborganlegt lögguteymi sem fær það hlutverk að boða eldri hjónum þau válegu tíðindi á aðfangadagskvöld að dóttir þeirra sé dáin. Lögregluþjónarnir eiga bágt með að leiðrétta misskilning sem verður áður en þeir hafa að fullu útskýrt mál sitt, því að hjónin halda að hundurinn þeirra hafi dáið. Inn í þennan misskilning bætast fleiri misskilningar, fléttur og fleiri persónur, prestur í dragi, móðursjúk byltingarkona og hjartveiki föðurins sem gerir verkefni þeirra nánast ómögulegt.
Einhverjir muna ábyggilega eftir söngleiknum Gretti sem var sýndur í Austurbæjarbíó fyrir 26 árum með Kjartan Ragnarsson síðar leikstjóra í titilhlutverkinu. Þetta er ekki leikgerð á fornsögunni heldur er Grettir unglingsstrákur í Reykjavík, skotspænir félaga sinna vegna þess hversu einfaldur hann er og mikil bleyða. Allt breytist það þegar hann fær hlutverk í sjónvarpsseríu byggða á Íslendingasögunni um Gretti sterka. En Glámur gerir honum lífið óbærilegt eins og nafna hans forðum. Söngleikurinn er eftir þrístirnið Ólaf Hauk Símonarson, Þórarin Eldjárn og Egil Ólafsson.
Íslenski dansflokkurinn verður með sínar sýningar í húsinu að venju og verða tvö íslensk verk frumsýnd í haust, Flest um fátt eftir dansarana Aðalheiði Halldórsdóttur og Valgerði Rúnarsdóttur og Við erum komin eftir Ólöfu Ingólfsdóttur. Í febrúar verða sýnd tvö frumsamin verk eftir rísandi stjörnur í evrópsku danslífi, Roberto Olivan og André Gingras. Í vor verður svo hin vinsæla dansleikhússamkeppni LR og ÍD. Í ofanálag við allt þetta má minna á Hláturhátíðina, leiklestra og tónleika sem lífga upp á húsið milli leik- og danssýninga.
Leikfélag Akureyrar frumsýnir fjögur verk á leikárinu fyrir utan sýningar frá síðasta leikári, gestasýningar, leiklestur og leikhúsferð til London. Fyrsta frumsýningin er á Herra Kolbert, fáránlegu og sprenghlægilegu spennuleikriti eftir David Gieselmann. Leikendur eru ungir og ferskir eins og vænta má í húsi Magnúsar Geirs, þeirra á meðal Edda Björg Eyjólsdóttir, Guðjón Davíð Karlsson og Unnur Ösp Stefánsdóttir. Jón Páll Eyjólfsson leikstýrir eins og Maríubjöllunni í vor.
Martin McDonagh kannast þeir við sem sáu Koddamanninn, Halta Billa og ekki síst Fegurðardrottninguna frá Línakri á undanförnum árum. Leikritið Svartur köttur sem LA frumsýnir í janúar (nema Herra Kolbert rugli öllum fyrirætlunum) er eitt hans svakalegasta, en flokkast þó sem gamanleikrit. Þar snýst allt um dauðan kött sem Patrekur elskaði meira en nokkuð annað. Hann vill hefna kattarins, og málið er að Patrekur er ekkert lamb að leika sér við. Magnús Geir leikhússtjóri leikstýrir sjálfur sínu úrvalsliði.
Barnaleikritið fyrir norðan verður Karíus og Baktus, poppað rækilega upp með hjálp Tvöhundruðþúsund naglbíta, Ástrós Gunnarsdóttir leikstýrir. Þá bræður leika að þessu sinni Guðjón Davíð Karlsson og Ólafur Steinn Ingunnarson.
Vorsýningin í húsinu er svo nýtt íslenskt leikrit, Lífið – notkunarreglur, eftir Þorvald Þorsteinsson. Sýningin er lokaverkefni útskriftarárgangs leiklistardeildar Listaháskólans og leikaraefnin munu vinna hana í samvinnu við leikara hússins. Leikstjóri er Kjartan Ragnarsson sem snýr nú aftur í leikhúsið eftir nokkurt hlé meðan hann kom upp sínu fína Landnámssetri í Borgarnesi. Ekki þarf að tíunda fyrri verk Þorvalds, nægir að minna á það góða stykki Skilaboðaskjóðuna, bæði á bók og sviði, Blíðfinn sömuleiðis og leikritið (og sjónvarpsmyndina) …and Björk of course.
Málið er fremur einfalt fyrir norðan, en hvar á sunnlendingur að kaupa sér kort? Svolítið getur hann farið eftir smekk. Þeir sem velja nýtt íslenskt umfram annað munu halla sér að Þjóðleikhúsinu, þeir sem eru svolítið nostalgískir munu velja Borgarleikhúsið, en best er auðvitað að eignast kort á góðum prís á freistandi sýningar í báðum húsum og jafnvel fyrir norðan líka.
Opnunarhátíð Borgarleikhússins
 |
| Ronja með mömmu sinni. |
Sunnudaginn 3. september milli 15-17 verður opið hús í Borgarleikhúsinu með fjölbreyttri og skemmtilegri dagskrá, tónlist og góðri stemningu og veitingum fyrir unga sem aldna. Meðal annars mun leikhússtjórinn baka vöfflur handa okkur! Þetta er gott tækifæri fyrir leikhúsáhugafólk til að kynnast leikhúsinu og starfsfólkinu, fylgjast með æfingum og fá nasaþef af dagskrá vetrarins. Þarna fá gestir að hitta ekki minni menn en Hitler, Mozart og Ronju ræningjadóttur sem veitir verðlaun í samkeppni um teikningar af sér!
Leikfélag Reykjavíkur á stórafmæli á leikárinu, verður 110 ára í janúar 2007 og gerir gestum sínum ómótstæðilegt afmælistilboð sem gildir aðeins í tvo daga, laugardaginn 2. september og sunnudaginn 3. sept. Tilboðið gengur út á þriggja sýninga áskriftarkort sem kosta aðeins 3.000 krónur og gilda á Mein Kampf, Dag vonar og eina sýningu í viðbót hjá Leikfélagi Reykjavíkur að eigin vali.
Miðasalan er opin frá klukkan 12-20 báða dagana.
Bókafréttir
 |
 |
 |
Nýjar bækur sem TMM hafa borist
Stafsetningarorðabókin er hin opinbera réttritunarorðabók um íslensku. Hún var samin í Íslenskri málstöð í umboði Íslenskrar málnefndar. Ritstjóri er Dóra Hafsteinsdóttir. Hér má fletta upp öllum almennum orðum í málinu auk fjölda mannanafna, örnefna, ríkja- og þjóðaheita og orðaforða úr helstu fræðigreinum. Sýndar eru beygingar og notkunardæmi auk ýmissa algengra orðatiltækja. Þar að auki eru ýtarlegar ritreglur í bókinni.
Frá Vöku-Helgafelli kemur líka þörf bók: Lifum lífinu hægar. Ekki mun veita af því að hægja á Íslendingum sem láta fara í taugarnar á sér hverja sekúndutöf. Markmiðið með bókinni er að fólk fái meiri gleði út úr lífinu, meiri nautn á öllum sviðum lífsins, og nái þar að auki betri heilsu. Það bætir nefnilega ekki meltinguna að borða á hlaupum! Það bætir heldur ekki kynlífið að flýta sér. Í bókinni má fá mörg góð ráð til að fá meira út úr lífinu. Höfundur er blaðamaðurinn Carl Honoré og Geir Svansson þýðir. Höfundurinn kemur til Íslands í tilefni af útgáfunni og flytur fyrirlestur í Bókabúð Iðu við Lækjargötu á fimmtudaginn kl. 20.
Vaka-Helgafell gaf fyrr í ár út aðra bók ekki alveg óskylda hinni hæglátu. Hún er eftir Ingrid Kuhlman og heitir Tímastjórnun í starfi og einkalífi. Ingrid kennir nefnilega lesendum sínum ekki bara að stjórna tíma sínum heldur líka að forgangsraða því sem gera þarf og taka frá tíma til að sinna vel þeim verkefnum sem skipta mestu máli. Líklega væri ekki svo galið að lesa þessar tvær bækur saman…
Frá bókaútgáfunni Mostrarskeggi hafa borist tvær bækur eftir Kormák Bragason, en það er rithöfundarnafn Braga Straumfjörð Jósepssonar. Þykk og mikil er skáldsagan Gáfnaljósið sem er tileinkuð ýmsum merkismönnum úr vinahópi höfundar. Þar er aðalpersóna unglingurinn Guðlaugur og söguefnið einkum litríkt kvennafar hans. Hin bókin geymir leikritið Mennsku.
Carl Honoré segir frá því í bókinni sinni hvað hann varð upprifinn þegar hann frétti um bækur handa börnum sem bara tæki mínútu að lesa. Þá átti hann ungan son sem vildi sí og æ láta lesa fyrir sig, og þetta var áður en Carl lærði að lifa lífinu hægar. En bækurnar um það þegar Max fer í feluleik eða þegar Max fer á leikvöllinn (Mál og menning) taka varla nema mínútu í lestri – það er að segja textinn – en myndirnar geta tekið óratíma fyrir ungan bókaorm. Bækurnar eru eftir belgíska listamanninn Guido van Genechten og Kristín Steinsdóttir þýðir þær.
Dagbók flettarans síðustu helgina í ágúst
 |
Sjá http://www.tmm.is/default2.asp?strAction=getPublication&intPublId=483
Dagbók flettarans síðustu helgina í ágúst
 |
| Tveir af dönsurum Helga Tómassonar í flokknum sem nú er meðal fimm bestu í heimi. |
Síðustu helgina í ágúst – getur þetta verið rétt? Sumarið bara búið. En búið að vera gott – með Grímseyjarför og allt. Síðast var farinn Kaldidalur upp í Borgarfjörð í gær í fínu veðri, fjallasýnin óviðjafnanleg. Nema hvað Ok er óttalega orðinn ómyndarlegur jökull. Þó varð hann soldið flottur þegar við vorum komin norður fyrir hann, fór að minna á Skjaldbreið.
Jöklar minna mig á nýjan æsifregnastíl fréttastofu RÚV sem sagði frá bráðnun jökla á landinu eins og hún væri yfirvofandi, sennilega fyrir næstu mánaðamót. Það er ekki fallegt að hrella fólk svona. Enginn getur spáð hvernig náttúran kemur til með að haga sér á næstu hundrað árum. Líka var fullkomlega óþolandi að hlusta á hvern fréttatímann af öðrum eftir menningarnótt hefjast á því að flugeldasýningin hefði fælt hross sem hefði valdið banvænum árekstri einum og hálfum klukkutíma síðar. Löngu seinna viðurkenndu fréttamenn að sprengingar mun seinna og mun nær hrossinu hefðu fælt það. En spurði einhver hvað hross væri að gera utan girðingar nærri mesta þéttbýli á landinu þar sem bílar eru fleiri en nokkurs staðar á byggðu bóli í Evrópu?
Í Helsinki er mér sagt að þróunin í sambandi við menningarnótt þar í borg hafi verið svoleiðis að fjölmiðlar hefðu hamast svo yfir drykkjuskap unglinga eftir hverja menningarnótt (eins og gert er hér líka, þó að unglingar drekki um hverja helgi í miðbænum og láti síst verr eftir menningarnótt en aðrar helgar) að nóttin hefði verið flutt af laugardegi yfir á fimmtudag. Það skipti engu máli. Þá var hún flutt yfir á sunnudag og enn drukku unglingarnir eins og þeir gerðu allar aðrar nætur. Þá var menningarnótt í Helsinki lögð niður. Ekkert kemur í veg fyrir unglingadrykkju, allra síst tilraun til að “gera menningarnótt að sunnudagaskóla” (sem Hjálmar H. Ragnarsson aftekur í Blaðinu á þriðjudag). Því segi ég það: Ef þessi besti dagur Reykjavíkur verður frá okkur tekinn þá verður það fjölmiðlunum á kenna.
Smám saman leka út fréttir um leikhúsin í vetur. Í Mogga á þriðjudag kom fram að Rúnar Freyr Gíslason leikari verður í láni hjá Leikfélagi Reykjavíkur í haust til að leika annan bróðurinn í Degi vonar eftir Birgi Sigurðsson, undir stjórn Hilmis Snæs Guðnasonar. Þetta er eftirminnilega magnað verk sem gaman verður að sjá í nýrri uppsetningu. Svo kynnti Magnús Geir veturinn í leikhúsinu sínu á Akureyri í vikunni og þar er margur feitur biti. Einkum er mikið tilhlökkunarefni að fá að sjá þar nýtt leikrit eftir Þorvald Þorsteinsson næsta vor.
Talandi um fréttir í menningarmálum þá rak ég upp risaaugu á miðvikudaginn þegar ég las það í Mogga að Helgi Tómasson væri væntanlegur á Listahátíð næsta vor með sinn fína ballettflokk frá San Francisco. Það er full ástæða til að reyna að lifa veturinn af þó ekki væri nema þess vegna.
Meiri kraftur og aukinn uppreisnarandi, segir nýr forstöðumaður Listasafns Reykjavíkur í fimmtudagsfréttablaði. Mæli hann manna heilastur. Lengi hefur viss munur verið á sýningum í Hafnarhúsi og Kjarvalsstöðum en nú á að gera hann markvissan. Í Hafnarhúsinu á uppreisnin að vera en málverkið á Kjarvalsstöðum. Listasafn Reykjavíkur er sprelllifandi þessi misserin og gaman að koma þangað.
Í Mogga á fimmtudag, síðasta degi fyrir hina margboðuðu breytingu á blaðinu, var fjögurra dálka grein eftir Steinunni Sigurðardóttur í miðopnu sem heitir “Fólkið fyrir neðan stíflu”. Þetta er ekki aðeins flott og vel skrifuð grein heldur birtist þar ný hlið á Kárahnjúkadeilunni: hvað gerist í Jökuldalnum ef stíflan mikla brestur? Ég verð æ sannfærðari um að aldrei verði hleypt vatni á Hálslón og gróðinn af Símasölunni verði notaður til að borga Alcoa skaðabætur…
Á föstudag kom út “nýr og breyttur” Moggi. Ég verð að játa að eina verulega breytingin sem ég tók eftir var dökki borðinn sem núna er kominn yfir hið fornfræga og virðulega nafn blaðsins á forsíðu. Í stað þess að kynna efni undir heiti blaðsins er það nú kynnt fyrir ofan það, og borðinn auk þess mun litsterkari og meira áberandi. Niðurröðun efnis í blaðinu er hin sama hvað mig varðar, hámenningarefni fyrir framan miðju og menningarblanda aftast. Ég les aldrei Staksteina svo ég hefði ekki getað sagt frá því hvar þeir hefðu verið áður. Lesbókin var sjálfri sér lík en Sunnudagsblaðið var gríðarlega efnismikið þótt ekkert væri Tímaritið.
Gaman var að lesa úttekt Fréttablaðsins á föstudaginn á greinaflokki í spænska blaðinu El País um Ísland. Blaðamaðurinn hafði fengið glýju í augun yfir öllu því glæsilega og vel talandi fólki sem hann hitti hér, flottasta menntamálaráðherra í heimi, yfirlýsingaglaðasta og orðheppnasta rithöfundi á norðurhveli jarðar og svo framvegis. Ekki veit ég hvernig manninum hefði orðið við ef hann hefði hitt myndarlegasta fjármálasnilling í vetrarbrautinni sem heill púllát áttblöðungur fjallaði um með Morgunblaðinu í gær. Þar er kominn alfaðir hinna nýju íslensku trúarbragða, eins og vel sást á forsíðumyndinni þar sem hann býr sig undir að taka okkur öll í fangið, og þurfum við nú engu að kvíða framar. Sérstaklega gladdist ég við að sjá að hann er búinn að lesa Draumalandið og finnst ástæðulaust að reisa álver í hverjum firði. Það styður áðurnefnda tilfinningu mína um Hálslón.
Ekki get ég séð að fjölmiðlar hafi almennt gert mikið úr nýjustu verðlaunaveitingu Vestnorræna ráðsins þó að aðrar fréttir af ársfundi þess hafi verið margar og ítarlegar. Ég hef bara séð barnabókaverðlaunin nefnd í menningarkálfi DV sem er þeirra nýjasta og besta púllát. Verðlaunin hlaut Færeyingurinn Bárður Óskarsson fyrir bókina Ein hundur, ein ketta og ein mús sem er bráðsnjöll saga með skemmtilegum og óvenjulegum teikningum um dýrin sem finnst svo hundleiðinlegt að vera vinir. Það kemur í ljós að síðan Torbjörn Egner heimtaði að öll dýrin í skóginum yrðu vinir þá er dýralífið óttalega tilbreytingarlaust. Enda springa þau félagarnir á limminu…
Í menningarkálfi DV er líka viðtal við Guðrúnu Evu Mínervudóttur sem á sumarsmellinn í ár, því hún þýddi Leyndardóm býflugnanna eftir Sue Monk Kidd. Nú er Yosoy líka komin í kilju, einkennilega skáldsagan sem Guðrún Eva gaf út fyrir síðustu jól. Bendi ég öllum bókmenntaáhugamönnum sem ekki hafa lesið hana að grípa nú tækifærið. Sú bók situr í heilanum – af ýmsum ástæðum. Má hér líka minna á að nýr smellur er kominn frá Bjarti: Norwegian Wood eftir Haruki Murakami í þýðingu Ugga Jónssonar. Þetta er kjútasta bók Murakamis, alger rúsínubolla með glassúr en samt svo djúp og sár og viðkvæm og heillandi … Þið haldið bara áfram að tína fram í huganum orð í svipuðum dúr í nokkrar mínútur, þá ætti þetta að vera komið.
Það er ritdómur um nýja smásagnasafnið hans Murakamis í Lesbókinni síðast eftir Úlfhildi Dagsdóttur, fínn dómur, ég las talsvert framan af honum en þegar kom að sögum sem ég er ekki búin að lesa þá ákvað ég að geyma hann þangað til ég er búin með bókina. Svo las ég um upplifun Gerðar Kristnýjar á skemmtun hjá Chippendales-flokknum á Broadway. Mér finnst ansi lélegt að þeir skuli ekki dansa í takt. Það hlýtur að vera hægt að fá almennilega fagmenn í svona sjó. Þetta með öðru olli því að ég sá ekki eftir að hafa sleppt skemmtuninni…
Félagsfræðingar Vesturlanda standa í heilmikilli auglýsingaherferð fyrir ástina og hjónabandið þessi misserin – og takið eftir: ástina og hjónabandið saman. Ekki ástina sér og hjónabandið sér! Í blöðum vikunnar var bent á að ástin (+ hjónaband og barneignir) væri besta ráðið gegn afbrotum (Blaðið), giftir karlmenn séu hamingjusamari en ógiftir (Fréttablaðið) og skilnaður skaði hjartað (Moggi). Mér dettur í hug þegar ég sé að ég gifti karlmenn en kvæni þá ekki, að sögnin að ”kvænast” þýðir að eignast konu. Þess vegna var það klaufalegt af útvarpsstjóra þegar hann las í fréttum Sjónvarpsins að kona sem fórst af slysförum hefði verið ókvænt. Það er gott dæmi um ofrétt málfar – þegar fólk vandar mál sitt svo mikið að það segir vitleysu.
Það var rétt hjá Fréttablaðinu í gær, í Reykholti er meira en bara Snorri Sturluson. Þar er líka búið að opna gömlu kirkjuna eftir gagngerar endurbætur. Nú er hún í upprunalegum 19. aldar litbrigðum, aðallega bleik og blá en líka hvít, gyllt, brún og græn. Gullfalleg blúndukirkja. Verst að búið er að afhelga hana þannig að ekki verður leyfilegt að halda þar kirkjulegar athafnir. En óguðlegar athafnir, tónleika og aðrar menningaruppákomur verður gaman að sækja í hana. Líka var hlýtt á fyrirlestur Guðrúnar Sveinbjarnardóttur um uppgröftinn á staðnum. Þar fannst mikil steinkista rétt fyrir verkalok núna um daginn en því miður gafst ekki tími til að gá í hana. Það verður vonandi gert næsta sumar. Spennandi að vita hvort sá dauði hefur verið höggvinn …
Gagnrýni Jónasar Sen er alltaf einstaklega læsileg og skemmtileg. Þó fannst mér óþarfi af Mogga að tvíbirta grein hans um kammertónleika í Listasafni Sigurjóns. Greinin birtist fyrst á sunnudegi, myndlaus, og aftur á þriðjudegi með stórri og fínni mynd. Ennþá vandræðalegri var uppákoman í Blaðinu á laugardag þegar það bað fólk að segja frá vandræðalegustu uppákomunni sem það hefði lent í og tvíbirti innganginn að viðtölunum!
Dansunnendur athugið: Pina Bausch kemur til Íslands
 |
Fjórar sýningar á verki hennar Aqua í Borgarleikhúsinu í sept.
Hið heimsfræga Wuppertal dansleikhús undir stjórn Pinu Bausch er væntanlegt til Íslands. Pina Bausch er einn áhrifamesti sviðslistamaður seinni tíma og er mikill fengur fyrir íslenska áhorfendur að fá að njóta snilli hennar. Aqua er stórbrotin sýning sem unnin var í samráði við borgina Sao Paolo í Brasilíu. Pina hefur ferðast um allan heim með sýningar sínar og unnið mörg verka sinna í samráði við borgir sem hún hefur heillast af. Hver veit nema Pina verði uppveðruð af Reykjavík en eitt er víst að Reykjavík kemur til með að verða uppveðruð af Pinu.
Pina kemur ásamt fríðu föruneyti því um 50 manns koma að Aqua. Aðeins fjórar sýningar verða á Aqua, 17.,18.,19. og 20 september. Miðasala er í Borgarleikhúsinu.
Jónas leikur Mozart á Gljúfrasteini
 |
| Jónas Ingimundarson – leikur á flygil skáldsins á Gljúfrasteini. |
Sunnudaginn 27. ágúst er komið að síðustu tónleikunum í sofunni á Gljúfrasteini í sumar. Það er enginn annar en Jónas Ingimundarson píanóleikari sem lýkur þessari stofutónleikaröð með því að leika á flygilinn.
Stofutónleikarnir á Gljúfrasteini hafa gengið mjög vel og verið fjölsóttir. Fólk í öllum skotum, frammi á gangi og í stiganum upp á efri hæðina þegar flest hefur verið. Enginn hefur kvartað yfir vondu sæti hingað til enda hljómburðurinn frábær í húsinu og nánast sama hvar fólk situr því alls staðar hljómar vel. Það er því öruggt að framhald verður á tónleikahaldi á Gljúfrasteini. Tónlistarráðunautur Gljúfrasteins er Anna Guðný Guðmundsdóttir pianóleikari.
Eins og áður hefjast tónleikarnir á sunnudaginn kl. 16 og er aðgangseyrir 500 kr.
Efnisskrá:
Wolfgang Amadeus Mozart: Sónata í A dúr KV 331
(1756 – 1791)
Robert Schumann: Papillion op. 2
(1810 – 1856)
Jónas Ingimundarson stundaði tónlistarnám við Tónlistarskólann í Reykjavík og framhaldsnám við Tónlistarháskólann í Vínarborg. Jónas hefur síðan starfað sem píanóleikari, tónlistarkennari og kórstjóri. Hann hefur haldið fjölda tónleika á Íslandi og komið fram víða í Evrópu og Bandaríkjunum, ýmist einn eða með öðrum, einkum söngvurum. Jónas hefur leikið inn á fjölda hljómplatna og hljómdiska og hefur staðið fyrir öflugu tónlistarkynningarstarfi í tengslum við tónleikahald sitt. Jónas hefur fengið listamannalaun og notið starfslauna listamanna og hlotið margvíslegar viðurkenningar, svo sem heiðursverðlaun VÍS, Íslandsbanka og DV og heiðursverðlaun Íslensku tónlistarverðlaunanna 2001, þegar þau voru veitt í fyrsta sinn. Jónas Ingimundarson var sæmdur Riddarakrossi hinnar íslensku fálkaorðu árið 1994 og Dannebrog orðunni árið 1996. Árið 2004 var Jónas valinn heiðurslistamaður Kópavogs. Jónas er tónlistarráðunautur Kópavogs.
Sjá nánar http://www.gljufrasteinn.is/frett.html?nid=1002