Bikini, Bubbi og allt þar á milli
 |
í blöðunum um og eftir helgi
sjá http://www.tmm.is/default2.asp?strAction=getPublication&intPublId=445
Bikini, Bubbi og allt þar á milli
 |
í blöðunum um og eftir helgina
Í grein Merete A. Baird um fyrirbærið kemur líka fram að bílasmiðurinn fékk enga sundfatafyrirsætu til að sýna bikiníið á fyrstu tískusýningunni. Þá sótti hann sér bara dansmey inn á nektardansstað sem sýndi sig glöð í hönnuninni. Henni var líka tekið ansi miklu betur en fötunum, þau vöktu aðallega ergelsi og hneykslun þangað til Brigitte Bardot sat fyrir á ströndinni í Cannes í öngu nema stórrósóttu hlíralausu bikiní árið 1956. Þá slógu þau líka rækilega í gegn.
Í sama blaði las ég um rómaða yfirlitssýningu á verkum rómantíska þýska myndlistarmannsins Caspar David Friedrich í Essen í Þýskalandi. Þar stendur sýningin til 20. ágúst og flyst þaðan til Hamburger Kunsthalle. Þar verður hún til sýnis frá 7. október til 28. janúar 2007. Caspar David er ótrúlega magnaður listamaður sem nístir augnablikið sem fáir aðrir. Maður gleymir sér gersamlega frammi fyrir verkum hans, undurfögrum og þrungnum dul.
Enn er í þessu ágæta tölublaði af WA greinin “Islandske delikatesser” eftir Marianne Hein, óttalegt bull um matarvenjur mörlandans. Hún segir að við séum hrædd við að borða humar, múslinga og ljóta fiska af því við óttumst að verða eins og þeir í framan! Svo æsir hún sig út af hákarli og virðist halda að enn megi ekki selja hér venjulegan bjór. Aðalefni greinarinnar er endursögn á Egils sögu Skallagrímssonar! En að lokum hælir hún lambakjötinu og stingur upp á nokkrum tegundum af meðlæti með því. Greyið.
Dásamleg var fréttin í Mogga í gær um íslensku dansarana sem sigruðu í alþjóðlegri danskeppni í Cesena á Ítalíu um helgina og gáfu Þorgerði Katrínu menntamálaráðherra gullbikarinn sinn af því þær eiga ekki lengur neinn skóla þar sem hann getur staðið til prýði og örvunar. Maður skilur satt að segja ekki þetta mál með Listdansskóla Íslands en vonar í lengstu lög að það verði almennilegur staður fyrir dansnema næsta vetur og framvegis.
Í sama Mogga var sagt frá átta ára snáða á Dalvík sem bjargaði lífi mömmu sinnar með því að sprauta hana meðvitundarlausa með adrenalíni. Honum er áreiðanlega ætlað stórt hlutverk í lífinu, þeim dreng.
Pistill Auðar Jónsdóttur í Tímariti Morgunblaðsins á sunnudaginn var um fordóma og sýndi hvað góðir kennarar geta gert ótrúlega hluti. Kennarinn hennar í dönsku í Kaupmannahöfn hafði látið nemendur sína ræða rétt samkynhneigðra til kirkjulegrar vígslu, og þegar kristnir og múslimar og allra handa höfðu rifist lengi skipaði hann fólki að skipta um lið og tala um hug sér. Það reyndist lærdómsríkt – ekki bara fyrir þá sem þurftu að verja rétt sem þeir voru harðir á móti heldur líka hina sem þurftu að banna það sem þeir voru fylgjandi.
Besta greinin síðan síðast er þó efalaust “Bubbi kóngur” eftir Hallgrím Helgason í Fréttablaðinu á mánudaginn. Þar rekur hann í stuttu máli afstöðu sína til Bubba síðan hann heyrði í honum fyrst – fordómana sem smám saman breyttust í virðingu og aðdáun – og talar þar áreiðanlega fyrir munn margra. “Bubbafan” varð hann þegar hann heyrði hann og horfði á hann segja sögur í fyrsta sinn og sú afstaða varð ennþá sterkari eftir að hann hafði fylgt honum á Hraunið á jólum. Endirinn er svo bestur: “Helgina fyrir afmæli Bubba sagði Halldór Ásgrímsson af sér sem forsætisráðherra. Geir H. Haarde tók hins vegar ekki við fyrr en viku síðar. Afmælisvikuna var því forsætisráðherralaust á Íslandi. Þá var landið konungdæmi, kónginum til heiðurs. hann lengi lifi.”
Húrra!
Steinunnarhátíð Sigurðardóttur
 |
| Steinunn Sigurðardóttir – einn vinsælasti skáldsagnahöfundur á Íslandi. |
í Iðusal við Lækjargötu á fimmtudagskvöldið
Steinunn Sigurðardóttir hreif lesendur með skáldsögunni Sólskinshestur um síðustu jól. Nú kemur sagan í senn út í kilju og sem net-hljóðbók í lestri höfundar sjálfs og verður þessi netgerð boðin öllum kostnaðarlaust til niðurhals af vefsíðunni edda.is næstu vikurnar. Það er í fyrsta sinn sem slík net-bók er gefin út óstytt hér á landi.
Þessari tvöföldu útgáfu verður fagnað með Steinunnarkvöldi í Iðusal (3. hæð) í Lækjargötu í Reykjavík fimmtudaginn 29. júní kl. 20.00. Hallgrímur Thorsteinsson, fjölmiðlamaðurinn góðkunni, og Ásdís Kvaran lesa ljóð Steinunnar og Úlfhildur Dagsdóttir bókmenntafræðingur spjallar um verk hennar. Steinunn les úr Sólskinshesti auk þess sem hún flytur framhald af þjóðhátíðarljóðinu “Einu-sinni-var-landið” sem fjallkonan Tinna Hrafnsdóttir flutti á Austurvelli 17. júní síðastliðinn.
Aðgangur er ókeypis og öllum heimill svo lengi sem húsrúm leyfir.
Útgáfa Sólskinshests sem net-hljóðbók eru tíðindi í íslenskri útgáfusögu. Í fyrsta sinn hérlendis er almenningi boðið að sækja sér heila bók í lestri höfundar á netinu á mp3 sniði. Útgáfa á hljóðbókum á þessu sniði er mjög að sækja í sig veðrið á alþjóðavísu og Edda útgáfa og Steinunn Sigurðardóttir ríða á vaðið hérlendis og bjóða aðgang að bókinni gjaldfrítt fyrstu vikurnar. Öruggt er að þeir mörgu sem eiga hljóðsmala fyrir mp3-skrár munu fagna þessu framtaki.
Sólskinshestur hlaut stórkostlegar viðtökur gagnrýnenda og bókakaupenda þegar hún kom út í fyrrahaust. Skapti Þ. Halldórsson, gagnrýnandi Morgunblaðsins, sagði um bókina “Sumar bækur hitta beint í hjartastað. Sólskinshestur er af þeirri náttúru.” Úlfhildur Dagsdóttir sagði á bokmenntir.is: “Sólskinshestur er frábærlega falleg bók, áhrifarík og býður lesanda upp á háskalega og heillandi tilfinningalega rússibanaferð.”
Nykurinn rís upp úr tjörn sinni að nýju
 |
| Ingibjörg Haraldsdóttir er gestur Nykursins á miðvikudagskvöldið. |
og les upphátt fyrir fólk á miðvikudagskvöldið
Árið 1995 var Nykur stofnaður af nokkrum ungum skáldum sem bókmenntavettvangur og sjálfshjálparbókarforlag. Á vegum Nykurs komu fyrstu verk skálda og rithöfunda á borð við Andra Snæ Magnason, Davíð A. Stefánsson, Steinar Braga, Ófeig Sigurðsson og fleiri. Alls komu út 13 bækur á vegum Nykurs til ársins 2003, en þá fór hann aftur í tjörnina og beið færis.
Nú, þremur árum síðar, hefur stokkast upp og fjölgað í mannafla Nykurs. Yngri skáld hafa bæst í hópinn og flóran orðin meiri. Miðvikudagskvöldið 28. júní mun Nykurinn koma aftur upp á yfirborðið, tvíefldur og með ferskan blæ. Frá og með þessum tímapunkti mun Nykur verða nýtt skálda- og bókmenntaafl á Íslandi.
Með haustinu munu koma út bækur nokkurra skálda undir merkjum Nykurs.
Upprisukvöldið mun fara fram á Cafe Rósenberg og hefjast kl. 22:00. Skáldin munu lesa upp úr frumsömdu efni, en á milli þess verður farið yfir hvað Nykur hefur gert og hver framtíð hans er.
Nykurskáld að þessu sinni verða: Arngrímur Vídalín, Davíð A. Stefánsson, Emil Hjörvar Petersen, Kári Páll Óskarsson og Urður Snædal.
Kynnir verður Hildur Lilliendahl og sérstakur gestalesari verður Ingibjörg Haraldsdóttir. Allir velkomnir og aðgangur er ókeypis.
Ímyndir Íslands
 |
| Sumarliði R. Ísleifsson |
Fyrirlestur í Þjóðmenningarhúsinu
Á miðvikudaginn 28. júní kl. 12 á hádegi heldur Sumarliði R. Ísleifsson sagnfræðingur erindi í bókasal Þjóðmenningarhússins í tilefni af opnun sýningar þar um skrif erlendra manna um Ísland og Íslendinga fyrr á öldum. Sýningin nefnist Í spegli Íslands og tekur til skrifa allt frá 16. öld. Sumarliði kallar erindi sitt Carta Marina og ímyndir Íslands.
Carta Marina er Norðurlandakort eftir Svíann Olaus Magnus, gert í Róm á fyrri hluta 16. aldar. Olaus dregur ekki aðeins upp mynd af löndunum heldur greinir frá ýmsu sem hann telur sig vita um þau. Sumarliði skoðar hvaða hugmyndir hann hefur um Ísland, hvernig þessar hugmyndir hafa enst og hvort sjá megi þær í umfjöllun um Ísland í samtímanum. Jafnframt veltir Sumarliði fyrir sér spurningunni um hvernig hugmyndirnar um Ísland urðu til.
Öllum er frjálst að koma og hlýða á erindið og þiggja veitingar við opnunina.
Landsbókasafn Íslands – Háskólabókasafn setur sýninguna upp í bókasal og stendur hún til 13. ágúst nk.
ÞJÓÐMENNINGARHÚSIÐ
Hverfisgötu 15, 101 Reykjavík, s. 545-1400
thjodmenning@thjodmenning.is
www.thjodmenning.is
Íslensk fatahönnun
 |
| Þessi flík er frá STEINUNNI, en hún sýnir nú í Nordatlantens Brygge í Kaupmannahöfn (til 9. júlí). |
á spennandi sýningu í Þjóðmenningarhúsinu
Við opnunina munu Geir H. Haarde forsætisráðherra, Guðríður Sigurðardóttir forstöðumaður hússins og sýningarstjórinn, Matthias Wagner K flytja ávarp. Aðstoðarmaður hans er Sabine Schirdewahn.
Sýningin stendur til 27. febrúar 2007.
Hafragrautur, Grímur og ímyndarauglýsingar
 |
í blöðunum í vikunni sem leið
sjá http://www.tmm.is/default2.asp?strAction=getPublication&intPublId=440
Hafragrautur, grímur og ímyndarauglýsingar
 |
| Pétur Gautur hirti eiginlega allar Grímurnar … |
í blöðunum síðustu viku
… en í bústaðnum rifjaðist upp fyrir mér hvað þetta er gríðarlega góður matur og fer vel í maga, og síðan hef ég með ástríðu eldað mér graut í hádeginu. Ég hafði því sérstaklega gaman af að sjá hnakkann Gillzenegger mæla eindregið með hafragraut í heilsuhorni Blaðsins í vikunni. Hann vill að visu láta mig borða hann á morgnana en ég er viss um að hann fyrirgefur mér að vilja heldur AB mjólk á þeim tíma, af því ég er kona og þarf að hugsa um beinin …
Hvað skyldi hafa valdið því að Moggi lét áhorfendaverðlaunin ganga til Fullkomins brúðkaups í frétt sinni um Grímuna á laugardaginn var, morguninn eftir afhendingarhátíðina, en ekki til Hafsins bláa eins og rétt var? Kannski tók blaðamaðurinn ekki nógu vel eftir þegar hann horfði á sjónvarpið - kannski fannst honum þetta bara svo sjálfsagt að hann skrifaði það áður en úrslit símakosninganna lágu fyrir. Ég veit að ef ég hefði verið beðin að giska þá hefði ég giskað á Fullkomið brúðkaup … Moggi leiðrétti mistökin í mánudagsblaðinu.
Nýr blaðamaður á Mogga, Flóki Guðmundsson (af leikarakyni), vill ekki flokka leiksigra eftir kyni, eins og kom fram í grein hans í blaðinu í gær, heldur til dæmis eftir eðli hlutverksins – grín eða drama. Að sumu leyti er þetta rétt athugað, þá þyrfti ekki að hlæja að því þegar karlmenn fá í sífellu verðlaun fyrir að leika konur (en verðlaunin eiga samt að heita fyrir besta leik í karlhlutverki). En á hitt ber líka að líta að mun fleiri karlhlutverk eru að jafnaði leikin í leikhúsunum og hætt við að konur fengju verðlaunin á tíu ára fresti eins og önnur ókyngreind verðlaun. Þess vegna held að sé affarasælast að halda í skipulagið. Við viljum verðlauna konur.
Það mætti halda að Magni Ásgeirsson hefði verið valinn sem fyrsti maður í geimflugi til Júpiters en ekki einn af fimmtán sem keppa um að fá að syngja með hljómsveit í Ameríku sem er ekki til, svo rosalega var látið með hann í fjölmiðlum í vikunni. Viðtöl alls staðar – “súrrealísk upplifun”, sagði hann í Blaðinu, og keppinautarnir: ”alveg sturlaðar raddir”. En Magni reynir að halda réttum áttum, litli sonurinn níu mánaða er mun merkilegri en allt húllumhæið.
Viðskiptablaðið var með opnuúttekt á vaxandi fjölda lýtaaðgerða á Íslandi í miðvikudagsblaði sínu. Það er eðlilegt því ekkert fyrirbæri fær aðra eins auglýsingu nú um stundir, aðallega í sjónvarpsþáttum eins og Svaninum og Extreme Makeover. Þó að vel sé sýnt og tekið fram að þessar aðgerðir séu óhugnanlega sársaukafullar og erfiðar að öllu leyti þá er freistingin ennþá meiri að verða falleg. Úttektin er fín hjá Viðskiptablaðinu og mynd Halldórs Baldurssonar af ljóta parinu sem sýnir lækninum mynd af Angelinu og Brad er frábær, en fyrirsögnin á forsíðu er klaufaleg: “Hverjum þykir sinn fugl fagur” – það er einmitt það sem mönnum þykir ekki lengur.
Í sama Viðskiptablaði er Morgunblaðið sett á hillu með Daily Telegraph sem blað í vanda. “Lesendur Telegraph eru að eldast, líkt og lesendahópur Morgunblaðsins, og endurnýjunin er lítil sem engin.” Fullyrt er að Moggi hafi ekki skilað hagnaði undanfarin ár og nú vantar framkvæmdastjóra á blaðið, að því er virðist. Það er þörf á að fríska upp á blaðið, segir Vb, en segir ekki hvernig …
Hver hefði trúað því að Paul McCartney yrði einsamall á 64 ára afmælinu sínu? Þessi gulldrengur. Þormóður Dagsson hafði áhyggjur af þessu í Mogga eftir afmælið. Þessi Palli einn í heiminum þarf samt ábyggilega ekki að setja einkamálaauglýsingu í blöðin.
Talandi um auglýsingar þá slær kkert fyrirtæki Landsbankann út í ímyndarauglýsingum eins og berlega kom í ljós um síðustu helgi. Þar á bæ hafa menn miklu meiri áhuga á slíkum auglýsingum en upplýsingamiðlun um bankastarfsemi. Á 17. júní birtist þannig opnuauglýsing merkt bankanum en textinn var nýtt ættjarðarljóð eftir ættjarðarvin númer eitt, Andra Snæ. Þar mátti lesa um kosti landsins, “þúfur og jökla og geggjaða fossa” og hvað skáldinu þyki æðislegt að búa á þessu indæla skeri: “og að lokum sjálfsagt dýrðlegt að deyja / einn daginn er lífsklukkan hættir að tifa / þá hvíli ég í þinni mergjuðu mold /móðir min góða, Ísafold.”
Á kvenréttindadaginn 19. júní birtist svo texti á opnuauglýsingu bankans eftir Pétur Gunnarsson, frábær texti um ástina og rosalega smart upp settur. En er ekki ábyggilega rétt hjá mér að það sé stúlkan sem skrifar skilaboðin til stráksins - ekki strákurinn til stelpunnar?
“Íslensk náttúra er sameign okkar allra og leyndarmál í íslenskri náttúru eiga ekki að vera til,” segir Páll Ásgeir Ásgeirsson í viðtali um nýja útvivistarbók sína, Bíll og bakpoki, í Mogga í gær. “Bókin byggir á þeirri hugsjón að segja öðrum frá þeim fallegu stöðum og sérkennilegu sem finna má á landinu.” Í bókinni er einmitt lýst hvernig komast má án mikillar fyrirhafnar á ævintýralega staði sem jafnvel eiga ekki nafn ennþá.
Ég hef áður dáðst að Bakþönkum Þórhildar Elínar Elínardóttur í Fréttablaðinu og pistillinn hennar í vikunni um stærð húsnæðis var ansi góður. Mitt í vangaveltum um hvort fjölskyldan ætti að kaupa stærri íbúð vegna óvæntrar viðbótar heimsótti Þórhildur Árbæjarsafn og komst að því hvað hún bjó ótrúlega vel miðað við fjölskyldur af sömu stærð fyrir fáeinum áratugum: “Þegar sjö manna fjölskylda hafði eitt einasta íveruherbergi af meðalstærð til að sofa í, matast og lifa.” Hún gerir sér ekki háar hugmyndir um gagnsemi heimsókna á safnið fyrir fólk almennt en heldur þó að þær myndu hjálpa því til að sætta sig við aðeins minna …
Í Fréttablaðinu og RÚV var fólk spurt hvort það hefði velt sér upp úr dögginni á Jónsmessunótt og allir aðspurðir þvertóku fyrir það. Ég játa að þetta gerði ég einu sinni, þá fimmtán ára starfsstúlka á hóteli úti á landi. Baðaði mig undir litlum ísköldum fossi og velti mér upp úr dögginni á eftir. Mildi að ég fékk ekki lungnabólgu. Ekki man ég hvers ég óskaði mér en minnisstæð er lífsreynslan. Ógleymanleg.
Síðasta sýningarhelgi Birgis og Steingríms í LÍ
 |
NÚ ERU SÍÐUSTU FORVÖÐ AÐ SJÁ SÝNINGAR Á VERKUM TVEGGJA VIRTRA SAMTÍMALISTAMANNA, BIRGIS ANDRÉSSONAR OG STEINGRÍMS EYFJÖRÐ í Listasafni Íslands.
BIRGIR VAR VALINN FULLTRÚI ÍSLANDS Á FENEYJATVÍÆRINGNUM ÁRIÐ 1995 OG STEINGRÍMUR EYFJÖRÐ HEFUR VERIÐ VALINN FULLTRÚI ÍSLANDS ÁRIÐ 2007.
LEIÐSÖGN UM BÁÐAR SÝNINGARNAR Í FYLGD RAKELAR PÉTURSDÓTTUR Á SUNNUDAG KL. 14.00.
TILBOÐSVERÐ Á SÝNINGARSKRÁM UM LISTAMENNINA PRÝDDUM FJÖLDA LITMYNDA MEÐAN SÝNINGIN STENDUR, TIL SÖLU Í SAFNBÚÐ LISTASAFNSINS.
Birgir Andrésson (f. 1955) kom fyrst fram á sjónarsviðið á síðari hluta áttunda áratugar 20. aldar. Verk hans eru oft á þjóðlegum nótum og endurspegla áhuga listamannsins á íslenskri þjóðmenningu, arfleifð hennar og veruleikanum í dag. Verkin á sýningunni spanna allan feril Birgis.
Steingrímur Eyfjörð (f. 1954) hefur i verkum sínum farið inn á merkingarsvið heimspeki, vísinda, félags- og mannfræði. Teikningin er fyrirferðarmikill tjáningarmáti í verkum hans og í þeim sést náinn sjónrænn skyldleiki teikningarinnar við ritlistina. Verkin á sýningunni spanna allan feril Steingríms.
Sýningarstjórar eru Eva Heisler og Harpa Þórsdóttir.
Útivist heima og heiman
 |
 |
Nú er um að gera að nýta góða veðrið
Bók Hildar heitir Ætigarðurinn - Handbók grasnytjungsins og kom út hjá Sölku fyrir síðustu jól, en núna er afar góður tími til að útvega sér hana og byrja að lesa og framkvæma. Hildur fer vandlega yfir allt sem gera þarf í garðinum allan ársins hring, byrjar á vori, fikrar sig gegnum sumarið og haustið og endar á vetrinum. Á leiðinni gefur hún óteljandi góð ráð, segir sögur og gefur uppskriftir þannig að bókin er í senn upplýsandi handbók, gagnleg bók fyrir heimilið og skemmtileg aflestrar – sem ekki er minnst virði. Bókin er prýdd ljósmyndum úr heimilisalbúmi Hildar og Þórs manns hennar og skínandi skemmtilegum teikningum og skýringarmyndum í lit.
Meðal óvæntra uppskrifta sem Hildur gefur eru djúpsteiktir fíflahausar, hefðbundinn jafningur með njóla, súrusúpa, sulta með fjallagrösum og hvönn og hlóðasteiktar sölvakökur með fjallagrösum, en hún gefur líka uppskriftir að “venjulegum” mat sem maður ræktar samt sjálfur efniviðinn í að einhverju leyti. Svo gefur hún góð ráð við algengum kvillum eins og kvefi þannig að þetta er líka lækningabók. Ofan á allt þetta segir Unnur Jökulsdóttir í texta aftan á kápu að bókin hjálpi manni að vera manneskja…
Bók Páls Ásgeirs heitir Bíll og bakpoki og segir frá tíu nýjum gönguleiðum um Ísland. Þær miðast allar við að maður aki á bifreið sinni á ákveðinn stað og gangi frá honum og til hans aftur; gönguferðin sjálf er 40-70 km löng og þær liggja allar um óbyggðir en eiga að vera viðráðanlegar öllu fólki sem á annað borð ræður við að ganga slíka vegalengd og bera með sér tjald og búnað. Þetta er persónuleg bók eins og Ætigarðurinn, hér eru myndir úr heimilisalbúmi Páls Ásgeirs og Rósu Sigrúnar konu hans auk korta sem Ólafur Valsson teiknaði. Í “Inngangi” gefur Páll Ásgeir góð ráð sem eru ævinlega í gildi í öllum ferðalögum, til dæmis um ýmis öryggisatriði, fatnað og nesti.
Gönguleiðirnar eru spennandi. Það er farið umhverfis Tungnafellsjökul, um útilegumannadali á leið í Karlsdrátt, umhverfis Svartahnúksfjöll, um Kamba og Stakafell, fyrir Siglunes, um eyðibyggðir við Djúp og Grunnavík, umhverfis Langasjó, um Kálfafellsheiði, umhverfis Eiríksjökul og umhverfis Þórisjökul. Páll Ásgeir er traustur ferðafélagi eins og hann hefur áður sýnt í Hálendishandbókinni vinsælu, Útivistarbókinni og bókunum Gönguleiðum og Hornströndum. Mál og menning gefur út.