Mér dvaldist of lengi það dimmir af nótt
haustkaldri nótt á heiði.

Ég finn lynggróna kvos við lækjardrag
og les saman sprek í eldinn

barnsmá og hvít og brotgjörn skrek.
Sjá logarnir leika við strauminn

rísa úr strengnum með rödd hans og glit.
Ó mannsbarn á myrkri heiði

sem villist í dimmunni vitjaðu mín
vermdu þig snöggvast við eldinn

fylgdu svo læknum leiðina heim.

Ljóð dagsins er Harðindi eftir Þorstein frá Hamri

Ljóð dagsins er eftir Þorstein frá Hamri og heitir Harðindi. Það er úr bókinni Lifandi manna land, ort árið 1960 að sögn skáldsins. Erindi ljóðsins við okkar daga blasir við.

Harðindi

Harðnar á dalnum
og þó er einsog sum hús séu vel byrgð
ógrynni fjár ógrynni kynlegs silfurs
þekur túnbleðlana einsog sandrof
útlendíngasnjór
segja börnin og þora ekki að snerta
nema sum fyrir áeggjan miðaldra feðra

sumt fólk
þykist kenna þar einn og einn eyri frá sér
erfiðismenn og slíkir
harðnar á dalnum og sumum
á að nægja sitt nöldur:
jú að sönnu má kalla það framtak
að deyja

harðnar á dalnum
en dýrmætt hve sum spor varðveitast
í þessum brunagaddi
augum vorum til vöku
harðnar á dalnum og minni vort
styrkist í vindum
meðan einstaklíngsfrelsið fyllir svöl brjóstin

Nýtt TMM

Út er komið nýtt tölublað af Tímariti Máls og menningar sem að þessu sinni er að mestu helgað Bókmenntahátíð í Reykjavík. Hátíðin stendur yfir dagana 6. -12. september og von á fjölmörgum góðum gestum af því tilefni.

Heftið er afar gott undirbúningsrit fyrir þá sem vilja kynna sér ýmsa af erlendum höfundum hátíðarinnar en í því er fjallað um:

- Kader Abdolah
- Naja Marie Aidt
- Tariq Ali
- Jesse Ball
- Junot Díaz
- Gintaras Grajauskas
- Johan Harstad
- Benn Q. Holm
- Luis López Nieves
- Sofi Oksanen
- Anne B. Ragde
- David Sedaris
- Ngugi Wa Thiong’o

Í ritinu má einnig finna hugleiðingu eftir Salvöru Nordal um að Íslendingar taki að sníða sér stakk eftir vexti og Tryggva Gíslason um myndir sem til eru af Jónasi Hallgrímssyni; Hjalti Hugason les Íslandsklukkuna í kreppunni en Sigurjón Árni Eyjólfsson guðfræðingur og prestur skrifar rækilega um táknheiminn sem liggur bókum Bjarna Bjarnasonar til grundvallar. Páll Valsson ritar dóm um Amtmanninn á Einbúasetrinu eftir Kristmund Bjarnason, ljóð birta Vésteinn Lúðvíksson, Birgir Sigurðsson, Kristján Þórður Hrafnsson, Sveinbjörn I. Baldvinsson og Sverrir Norland og ný smásaga er eftir eftir Guðmund Brynjólfsson. Ádrepu ritsins skrifar Ármann Jakobsson sem bregst við hugleiðingum Gunnars Karlssonar í TMM 2:09 um skáldsögu hans Vonarstræti. Áskriftarsími er 5755600 en netfangið tmm@forlagid.is.

Leitað að þungum hníf og fjarstýringu

Skipuleggjendur kvikmyndahátíðarinnar RIFF leita nú ásamt Norræna húsinu að merkjum minjum sem tengjast íslenskri kvikmyndasögu. Þeir sem eru svo lukkulegir að búa yfir leikmunum, búningum eða öðru því sem tengist hérlendri kvikmyndagerð eru hvattir til þess að setja sig í samband við Ilmi Dögg Gísladóttur (ilmur@nordice.is) hjá Norræna húsinu fyrir 19. ágúst.

Fyrirhuguð er sýning á mununum á Bíóbarnum sem riggað verður upp í Norræna húsinu á meðan á kvikmyndahátíð stendur dagana 17-27. september.

Mistök við innheimtu TMM

Forlaginu hefur borist mikill fjöldi fyrirspurna í dag, 1. júlí, vegna innheimtubréfs sem áskrifendur að Tímariti Máls og menningar fengu í morgun.

Mistök áttu sér stað þegar greiðsluseðillinn var sendur út, svo nokkrir dagar liðu án þess að unnt væri að greiða kröfuna og á meðan söfnuðust upp vanskilagjöld hjá áskrifendum. Þetta var að sjálfsögðu ekki ætlunin og hér með biðjumst við afsökunar á þessum mistökum.

Til þess að áskrifendur þurfi ekki að greiða áfallin gjöld bjóðum við þeim á að leggja 6.000 krónur (ársgjaldið án vanskilagjalda) inn á reikning okkar gegnum heimabanka eða í bankaútibúi. Reikningsupplýsingar eru hér að neðan:

Bnr. 311, hb. 26, nr. 3423
Kt. 600201-2390

Við biðjumst aftur afsökunar á mistökunum og vonum að þið njótið lestursins.

Dauft er í sveitum – dagbók flettarans 13.6.09

Eva Joly viðhafði fáheyrðar aðferðir við að hafa sitt fram í vikunni: hún kom fram í fjölmiðlum. Og það var ekki til að bregðast við, snúa út úr, fara undan í flæmingi, fela, leyna, rugla, bulla – nei: hún kom fram í fjölmiðlum að eigin frumkvæði til þess að segja fólki eitthvað.

Svona gera náttúrlega bara útlendingar.

Og síðan hafa lögmenn keppst um að gera lítið úr henni. Á sumum er að skilja að Eva Joly og Sigríður Benediktsdóttir standi helst í vegi fyrir endurreisn landsins.

Annars er heldur dauft yfir blöðunum í dag, og skyldi engan undra. Hnipin þjóð í vanda. Við erum öll að þreytast. Áttundi mánuðurinn í Kreppu og enn sama strögglið, sama þokan, sama liðið að þybbast við. Að vísu verið að greiða úr Icesave.

Eða er það ekki?

Veðurfræðingurinn Haraldur Ólafsson finnur enn nýjan flöt á andstöðunni við Evrópusambandið í grein í Fréttablaðinu.

Af nokkurri fimi leiðir hann í ljós að hér sé um að ræða hernaðarbandalag. Fram að þessu höfum við talið að Evrópusambandið sé eitthvert máttugasta friðarbandalag í sögu Evrópu og jafnvel helsta ástæða þess að friður hefur haldist í þeim parti Evrópu sem það nær yfir frá 1945 – en nei: þetta er hernaðarvél að mati Haraldar, og enn ein ástæðan fyrir Íslendinga að halda sig utan við það. Hina friðelskandi Íslendinga. Hina mildu Íslendinga. Hina góðu Íslendinga. Hina öðruvísi en alla aðra Íslendinga. Hina ljúfu, blíðu, nægjusömu, kærleiksríku,hógværu, friðelskandi Íslendinga…

Skemmtilegt viðtal við Þröst Leó, þann afburðaleikara sem flettari myndi semja leikrit fyrir ef hann kynni að semja slíkt. Júlía Margrét er dugnaðarforkur og teflir líka saman tveimur ung-poppurum úr sitthvorum geira, Jóhönnu Guðrúnu og Unnstein Manuel. Þau eru kannski ekki alveg nógu ólík þegar til á að taka, þó að samtal þeirra sé ósköp notalegt yfir kornfleiksinu…

Annað nokkuð skemmtilegt viðtal skrifar Jakob Bjarnar við Helga Björnsson rokkara. Þar rymja þeir hvor á annan um startkafla, sveitaböll, fótbolta og annað karlmannlegt. Jakob er svo líka með myndir af Stefáni Mána að hnykla vöðvana – og brýnnar – grín um Evu Joly og annað karlmannlegt.

Í Mogga eru Staksteinar að þessu sinni ekki um Steingrím Jóhann. Hins vegar er maður búinn að gleyma um hvað dálkurinn er um leið og búið er að fletta. Öllu ánægjulegri flettingar eru á blaðsíðu 18 þar sem borgarstjórinn í Reykjavík sést tyrfa Lækjartorg með bjart bros á vör. Óskandi að þetta sé ávitull um blóm í haga á þessu hroðalega torgi – og Akureyringar ættu að taka sér þetta til fyrirmyndar og endurvekja Ráðhústorgið í fyrri mynd.

Í Lesbók er áhugaverð grein eftir Gerði Steinþórsdóttur um einn af þessum skrýtnu Englendingum sem hingað rákust og skrifuðu um það ferðabók; Watts þann sem skrifaði bókina „Norður yfir Vatnajökul“. Prýðileg grein. En er ekki kominn tími til að endurskoða smágreinastefnuna á Lesbókinni? Allt þetta smælki um plötur og  bækur og bíómyndir innan um forljótan grænan rasta sem verður einhvern veginn það eina sem maður sér…

Guðmundur Andri Thorsson

KK á Gljúfrasteini

KK leikur á gítar og syngur eigin lög, ný og gömul í stofunni á Gljúfrasteini, sunnudaginn 14. júní klukkan 16. Aðgangseyrir er aðeins 500 krónur.

Kristján Kristjánsson, betur þekktur sem KK, hóf atvinnumennsku í tónlist árið 1985 þegar hann lagðist í götuspilamennsku víðsvegar um Evrópu eftir að hafa stundað 4 ára nám við Tónlistarháskólann í Malmö. Árið 1990 kom hann heim til Íslands og hefur síðan starfað við tónlist, hljóðritun á eigin lagasmíðum og annarra, leikhús, kvikmyndir og nú síðast sem dagskrárgerðarmaður hjá RÚV.

KK hefur tvisvar verið tilnefndur til Grímuverðlauna og hefur tvisvar fengið Íslensku tónlistarverðlaunin. Síðasta plata KK “Svona eru menn“ (2008) kom út hjá JPV fyrir síðustu jól. KK er með tvær plötur í samantektinni á 100 bestu plötum Íslands, Lucky One (1991) og Bein Leið (1992).

Stofutónleikar Gljúfrasteins verða alla sunnudaga í sumar kl.16, nánar má lesa um dagskrána hér. Gljúfrasteinn er opinn alla daga í sumar frá kl. 9–17.

Nýtt Tímarit á leiðinni

Annað hefti TMM á árinu er í prentsmiðju og væntanlegt næstu daga.

Þar kennir ýmissa grasa. Má nefna klassíska grein eftir Thoreau um borgaralega óhlýðni og hugleiðingu eftir Pál Skúlason prófessor um það hvernig þjóðfélag við viljum. Úlfhildur Dagsdóttir gerir grein fyrir þýddum fantasíum og Gunnar Karlsson skrifar grein um Uppkastið svokallaða frá árinu 1908, en Ármann Jakobsson lét einmitt skáldsöguna Vonarstræti  hverfast um þá atburði

Ljóð eru eftir góðskáld á borð við Lindu Vilhjálmsdóttur, Anton Helga Jónsson, Þorstein Antonsson og Eirík Örn og svo er löng, ný og mögnuð saga eftir Steinar Braga.

Ritdómar um jólabækur eru eftir Guðrúnu Nordal, Atla Bollason, Björn Þór Vilhjálmsson, Árna Óskarsson og Svein Einarsson…